«Aýyl» partııasynyń «30 ıgi is» aktsııasy Túrkistan oblysynda jalǵasty

TÚRKІSTAN. QazAqparat- Qazaqstan Respýblıkasy Táýelsizdiginiń 30 jyldyǵyna oraı uıymdastyrylǵan «30 ıgi is» aktsııasynyń aıasynda «Aýyl» partııasy kezekti qaıyrymdylyq sharasyn ótkizdi, dep habarlaıdy QazAqparat tilshisi.

Partııa tizimimen saılanǵan Túrkistan oblystyq maslıhatynyń depýtaty Tóregeldi Qalmuratov ózi basshylyq etetin «Qazaqstandyq brendi bar balalar men eresekterge arnalǵan jórgekter óndirisi» zaýytynyń alǵashqy ónimin erekshe muqtaj jandarǵa tegin tapsyrdy.
Kólemi 4 000 dana medıtsınalyq buıym «Tasaryq» arnaýly áleýmettik qyzmet kórsetý ortalyǵy men Saıram aýdandyq jumyspen qamtý jáne áleýmettik baǵdarlamalar bóliminiń «Úıde áleýmettik qyzmet kórsetý» mekemesine tabystaldy.

Jaqynda ashylǵan kásiporny partııa múshesi, oblystyq maslıhat depýtaty Tóregeldi Qalmuratov pen Túrkııa kompanııasynyń birikken jobasynyń aıasynda qurylǵan. Balalarǵa arnalǵan gıgıenalyq ónim shyǵarýmen aınalysady. Jospar boıynsha óndiristik qýattylyǵy 400 mln dana bolmaq. Bul Qazaqstandaǵy ishki naryqtyń qajettiligin tolyq óteýge múmkindik beredi. Sonymen qatar, eksportqa shyǵarýda kózdelýde. Mundaǵy jórgekter ekologııalyq taza komponentterden jasalǵan, al onyń quramyndaǵy shıkizattyń barlyǵy otandyq ónim bolyp tabylady.

Qaıyrymdylyqqa arnalǵan zattardy tapsyrý barysynda Tóregeldi Qalmuratov «Aýyl» partııasynyń bastaǵan «30 ıgi is» aktsııasy Qazaqstannyń barlyq aımaqtaryn qamtıtyndyǵyn aıtyp, barsha qazaqstandyqtardy aktsııaǵa atsalysyp, qatysýǵa shaqyrdy.
Qazirgi tańda zaýytta 60 adam turaqty jumyspen qamtamasyz etilgen. Onyń 70 paıyzy - erekshe muqtaj jandar. Osy arqyly «Aýyl» partııasynan saılanǵan depýtat áleýmettik turǵydan az qamtylǵan azamattardyń kirisin kóbeıtip jatyr.
Esterińizge sala ketsek, 8 qarashada «Aýyl» partııasynyń «30 ıgi is» aktsııasy Almaty oblysynda baspanaǵa muqtaj adamdarǵa turǵyn-úı kiltterin tabystaýdan bastalǵan bolatyn. Іs-sharalar barasynda partııa músheleri qarttarǵa, kópbalaly otbasylar men múgedekterge qoldaý kórsetýdi josparlap otyr. Júzdegen muqtaj adamdar azyq-túlik sebetterimen, vırýsqa qarsy jáne ımmýnıtetti jaqsartatyn preparattarmen qamtamasyz etiletin bolady. Sondaı-aq oblys ortalyqtarynda «Dertti janǵa dem ber» donorlyq aktsııasy ótpek.
«30 ıgi is» tiziminde respýblıkalyq deńgeıge ıe jıyndar da bar. Oral qalasynda Aýyl jastarynyń III forýmy ótse, Almaty qalasynda túrli etnos ókilderimen stýdentter kezdespek. Al Kókshetaýda «Ózgerister aýqymy – úsh urpaq kózimen» taqyrybyndaǵy dóńgelek ústel uıymdastyrylady.
Aktsııa jeltoqsan aıynyń 16-na deıin jalǵasatyn bolady.