«Aýyl» partııasy óz úmitkerin qoldaý úshin forým uıymdastyrdy

ALMATY. QazAqparat - Almaty qalasyndaǵy D.Qonaev atyndaǵy Eýrazııalyq zań akademııasynda QR Prezıdenttigine kandıdat Tóleýtaı Raqymbekovty qoldaýǵa arnalǵan forým ótti. Bul jóninde «Aýyl» partııasynyń Feısbýktegi paraqshasynda jarııalandy.

Kandıdattyń senimdi ókilderi A.S.Saparov, S.A.Keshýov, S.I.Táńirbergenov Tóleýtaı Sataıulynyń eńbek jolymen tanystyryp, saılaýaldy baǵdarlamasynyń basym baǵyttaryna toqtaldy.

Forým barysynda jańa zamandaǵy aýyl ómiri, aýyldaǵy kásipkerliktiń damýy, aýyl sharýashylyǵy óndirisiniń tehnıkalyq jańǵyrýy, jas mamandardyń eńbekpen qamtylýy syndy ózekti máseleler tóńireginde sóz qozǵaldy.

Óz kezeginde stýdentter qaýymy jumyspen qamtý, turǵyn úımen qamtamasyz etý, bilim berýdi damytý týraly pikir almasty.
Senimdi ókilder prezıdenttikke kandıdat Tóleýtaı Raqymbekovty qoldap, 9 maýsym kúni ótetin saılaýǵa belsene qatysýǵa shaqyrdy.

Eske sala keteıik, 11 mamyr kúni saılaýaldy úgit-nasıhat naýqany bastalǵan bolatyn. QR Prezıdenttigine úmitker retinde 4 kandıdat tirkeldi. Búginde kandıdattar óńir-óńirlerdi aralap, úgit-nasıhat sharalaryn belsendi júrgizýde.