«Aýyl» partııasy men Agroónerkásiptik kesheni qaýymdastyqtarynyń alıansy memorandýmǵa qol qoıdy
Búgin elordada «Agroónerkásiptik keshendi damytý jańa baǵdarlamanyń tujyrymdamasy» taqyrybynda ótken dóńgelek ústel barysynda «Aýyl» halyqtyq-demokratııalyq patrıottyq partııasynyń tóraǵasy Álı Bektaev pen «Qazaqstannyń kartop jáne kókónis ósirýshiler odaǵynyń» tóraǵasy Qaırat Bısetaev yntymaqtastyq týraly memorandýmǵa qol qoıdy.
«Barlyǵymyz bir baǵytta – agrarlyq sektordy damytý boıynsha jumys istep jatyrmyz. Memorandým tek qaǵaz emes, bolashaqta birlesip jumys isteýge jáne osy salaǵa qatysty problemalyq máselelerdi sheshýge múmkindik beredi. Bizdiń maqsatymyz – halyqtyń ıgiligi úshin jumys istep, azamattardyń ómirin jaqsartý», - deıdi Alı Bektaev.
Іs-shara barysynda bıznes qaýymdastyqtar «Aýyl» halyqtyq-demokratııalyq patrıottyq partııasymen birge «Agroónerkásiptik keshenniń 100 problemalyq máseleleri jáne olardy sheshý joldary» tujyrymdamasy boıynsha usynystaryn aıtty. Dóńgelek ústelde aldaǵy 5 jylǵa arnalǵan agroónerkásiptik keshendi damytý baǵdarlamasyna engizilýi tıis birqatar tezıster men negizgi qaǵıdalar aıtylady.