«Aýyl» partııasy eńbek ozattaryn nasıhattaıtyn bastamany júzege asyrady

NUR-SULTAN. QazAqparat - «Aýyl» halyqtyq-demokratııalyq patrıottyq partııasynyń «Eńbek adamy - El tiregi» atty saıası bastamasyn júzege asyrýǵa arnalǵan is-sharalardy jarııalady, dep habarlaıdy QazAqparat tilshisi.

Atalǵan bastama 2019 jylǵy 27 qarashada «Aýyl» HDPP kezekti XVI Sezinde tanystyrylǵan edi.

«Aýyl partııasy 4 jyl boıy Táýelsizdik kúni qarsańynda eńbek ozattarynyń forýmyn ótkizip keledi. Ondaǵy negizgi maqsatymyz – túrli salada qyzmet etip júrgen eńbek ozattaryn shaqyryp, eńbek adamnyyń qoǵamdaǵy róli, bolashaǵy, jastarǵa úlgi bolý dárejesi talqylanyp, túrli salada eńbek etip júrgen eńbek ozattaryn marapattap kelemiz. Eńbek ozattary forýmyna daıyndyq barysynda marapatqa usynylǵandardyń ómirin zertteı otyryp, úlken jetistikterge jetý úshin qalaı ter tókkenin kórdik. Osy jumystar barysynda partııa atynan «Eńbek adamy - El tiregi» bastamasyn kóterýdi uıǵardyq», - «Aýyl» halyqtyq-demokratııalyq patrıottyq partııasynyń tóraǵasy Álı Bektaev Ortalyq kommýnıkatsııalar qyzmetinde.

Onyń aıtýynsha, partııanyń óńirlik fılıaldary daıyndyq jumystaryn bastap ketti.

«Eńbek ozattaryn dáripteý, BAQ-pen jumys isteý boıynsha partııa memorgandarǵa birqatar usynymdar ázirendi. Bizdiń negizgi maqsatymyz – túrli salada eńbek etip júrgen azamattardyń qoǵamdaǵy ornyn dáripteý. Aýyl sharýashylyǵynda ǵana emes, bilim, medıtsına syndy ekonomıkanyń túrli salasynda eńbek sińirip júrgen adamdardyń barlyǵy – marapatqa laıyq», - dedi partııa tóraǵasy.

Saıası bastama aıasynda partııanyń fılıaldary stýdentter, mektep oqýshylary jáne bolashaq mamandarǵa eńbek ozattarymen kezdesý uıymdastyrady.

«Aýyl» HDPP fılıaldarynyń Saıası keńesteri oblys, qala, aýdan ákimdikterine «Oblystyń qurmetti azamaty», «Qalanyń qurmetti azamaty», «Aýdannyń qurmetti azamaty» sııaqty ataqtarǵa laıyq eńbek adamdaryn usyný úshin tizim quryp jatyr. «Aýyl» HDPP-nyń ár fılıaly jyl boıy memlekettik jáne vedomstvolyq nagradalarǵa usynylatyn úmitkerlerdi anyqtaıdy. Olardyń qatarynda aýylsharýashylyq jumysshylar, mehanızatorlar, traktorshylar, saýynshylar, fermerler, aýyl muǵalimderi, dárigerler jáne basqa mamandyq ıeleri bar», - dedi Á. Bektaev.

Sonymen birge, «Aýyl» partııasy Youtube jelisinde «Eńbek adamy - el tiregi» taqyrybynda beınerolık baıqaýyn ótkizedi. Saıystyń erejesi jaqynda partııanyń auyl.kz resmı saıtynda jarııalanady. Baıqaýdyń nátıjesi jyl sońynda anyqtalady.