«Aýyl» partııasy aýyldarda sapaly medıtsınalyq qyzmet kórsetý máselesin kóterdi
Búgin Qaraǵandy qalasynda «Aýyl turǵyndaryna bilikti medıtsınalyq kómek» taqyrybynda dóńgelek ústel ótti. Іs-sharaǵa Qaraǵandy oblystyq densaýlyq saqtaý basqarmasy basshysynyń orynbasary G.S. Toqsambaev, aýdandyq aýrýhanalardyń bas dárigerleri men medıtsına qyzmetkerleri, óńirdiń medıtsına ýnıversıtetiniń, kolledjderiniń, mekemeleriniń basshylary, «Aýyl» partııasynyń belsendileri men músheleri qatysty.
Aýyl turǵyndaryna bilikti medıtsınalyq qyzmet kórsetý máselesin «Aýyl» partııasynyń músheleri jyldar boıy kóterip keledi. Osy jyl bul salanyń osaldyǵyn taǵy da kórsetti.
Pandemııa kezinde aýyl halqy laıyqty medıtsınalyq kómekten qaǵyldy: aýyl turǵyndaryna dıagnostıka júrgizilmedi, kóptegen eldi mekenderde dárihanalardyń bolmaýyna baılanysty medıtsınalyq preparattarǵa qoljetimdilik bolmady.
Al Covid 19-ben aýyrǵan aýyl turǵyndary sharasyzdyqtan halyqtyq medıtsınaǵa júginýge májbúr boldy. Bul faktilerdiń barlyǵyn «Aýyl» partııasynyń músheleri nazardan tys qaldyrmady. Tamyz aıynyń sońynda partııa músheleri aýyldaǵy medıtsınalyq qyzmetterge monıtorıng júrgizdi.
Belsendiler men eriktiler 200-den astam aýyldy aralap, feldsherlik pýnktter men aýyldyq aýrýhanalardyń jumysymen tanysty.
Júrgizilgen monıtorıng nátıjesinde partııalyqtardyń barlyq eskertýleri men usynystary partııa tóraǵasy, Parlament Senatynyń depýtaty Á. Bektaevtyń Premer-Mınıstr A. Mamınniń atyna joldaǵan depýtattyq saýalyna negiz boldy.
Qazirgi ýaqytta aýyl turǵyndaryna sapaly medıtsınalyq qyzmet kórsetý máselesi partııanyń erekshe baqylaýynda tur. Birqatar óńirlerde osy taqyrypta semınar-keńester, dóńgelek ústelder ótti.
Partııanyń Qaraǵandy fılıalyn QR UǴA akademıgi, «Fıtohımııa» holdınginiń bas dırektory S.M. Ádekenov basqarady. Ol óz sózinde aýyldyq jerlerde sheshilmeı kele jatqan máselelerge nazar aýdardy.
«Búgingi tańda eń ózekti másele – dárihana. Dárihanalar úlken aýyldardyń ózinde joq, shalǵaıdaǵy shaǵyn aýyldar týraly ne aıtýǵa bolady? Árıne, bızneske ár aýylda dárihana ashý tıimsiz. Mundaı jaǵdaıda memleket aralasýy kerek dep oılaımyz. Nege shalǵaı aýyldarda áleýmettik dárihanalar ashpasqa? Nemese pandemııa kezinde eń shalǵaı ýchaskelerdi, mal jaıylymdaryn aralaǵan mobıldi dárihanalardyń jaqsy mysaly bar. Bul jaqsy tájirıbeni búkil el aýmaǵynda qoldanýǵa bolady. Aýyldyq aýrýhanalarda mamandardyń jetispeýshiligi de - ótkir máseleniń biri. Qaraǵandy oblysynda biz 3-4 aýylda bir ǵana feldsher jumys isteıtin aýdandardy anyqtadyq. Shalǵaı aýyldarda ınternet pen telekommýnıkatsııanyń bolmaýy da ózekti ári kúrdeli másele bolyp tabylady. Qarapaıym mysal, keıbir aýyl turǵyndary aýdandyq aýrýhanalarmen habarlasa almaı otyr», - dedi ol jıynda.
Dóńgelek ústelge qatysýshylar aýyl turǵyndaryna bilikti medıtsınalyq qyzmet kórsetý jumysyn jaqsartý boıynsha usynystar engizdi.