«Aýyl» partııasy aqmolalyq sharýalarǵa óz kandıdatynyń baǵdarlamasyn tanystyrdy

NUR-SULTAN. QazAqparat - «Aýyl» partııasy atynan prezıdent saılaýyna túsip jatqan Tóleýtaı Raqymbekovtiń saılaýaldy baǵdarlamasy Aqmola oblysynda tanystyryldy. Bul týraly partııanyń baspasóz qyzmeti habarlady.

Baǵdarlama boıynsha, aýyl sharýashylyǵyn qoldaý álemniń jetekshi elderimen teń bolýy tıis. Prezıdenttikke úmitker Tóleýtaı Raqymbekov baǵdarlamasyndaǵy osy jáne ózge de tetikter Aqmola oblysynyń jurtshylyǵyna tanystyryldy.

«Jalpy, elimizdiń aýyl sharýashylyǵy salasynda osy óńirdiń alar orny erekshe. Máselen, bir ǵana Aqkól aýdanynda myńdaǵan gektar sharýashylyqqa jaramdy jer bar. Endi onyń áleýetin tolyq paıdalanyp, óńdeý ónerkásibine tyń serpin berý kerek. Osyndaı ustanymdy negizge alǵan Tóleýtaı Raqymbekov shtabynyń basshysy óńirge saparyn shaǵyn eldi mekenderden bastady» delingen habarlamada.

Serik Balǵazyuly - osy aýmaqtaǵy iri sharýalardyń biri. Qojalyǵynda júzdegen jylqy men myńnan asa qoı bar. Ereksheligi sol - bul kásipti onyń úsh balasy jalǵastyryp, aýqymyn odan ári keńeıtip jatyr. Prezıdenttikke úmitker Tóleýtaı Raqymbekov óz baǵdarlamasynda osyndı dástúrli sharýashylyqty qoldaýǵa shaqyrady. Sol arqyly jumyssyzdyqty azaıtyp, jappaı ýrbanızatsııaǵa jol bermeýge bolady deıdi.

«Aýyldan kóship kelgen turǵyndardyń qalada qıyndyq kórýi jıi kezdesedi. Kóbisi baspanasyz júr. Kóbisi jumyssyz. Balasyn balabaqshaǵa berýge qınalady. Sondyqtan, bizdiń kandıdattyń baǵdarlamasynda kórsetilgendeı, aýyldyń ınfraqurylymyn damytý kerek», - dedi prezıdenttikke úmitker T. Raqymbekovtyń respýblıkalyq qoǵamdyq shtabynyń tóraǵasy Álı Bektaev.

Stepnogor qalasynda ótken jıynda úmitkerdiń monoqalalardy damytýǵa, qala men aýyl arasyn jaqyndatýǵa jáne baspana máselesin sheshýge qatysty bastamalary jan-jaqty talqylandy.