Aýyl oqýshylaryna úzdik mektepterdiń pedagogteri onlaın sabaq beredi

ASTANA. QazAqparat – Premer-Mınıstrdiń orynbasary Altaı Kólginov Májilis depýtattarynyń saýalyna bergen jaýabynda aýyl mektebinde bilim sapasyn qalaı arttyrýǵa bolatynyn aıtty, dep habarlaıdy QazAqparat tilshisi.

«2022-2023 oqý jylynda daryndy balalarǵa arnalǵan mamandandyrylǵan mektepterge jalpy 4500 bala qabyldandy. Onyń ishinde 20% aýyldyq jerlerdiń oqýshylary. Aýyl mektepteriniń bilim sapasyn arttyrý úshin 2023-2024 oqý jylynda 5 óńirde (Aqtóbe, Aqmola, Qostanaı, Pavlodar, Soltústik Qazaqstan oblystarynda) «Tsıfrlyq tehnologııalardy paıdalanyp shaǵyn jınaqty aýyldyq mektepterdiń áleýetin damytý» pılottyq jobasyn iske asyrý josparlanyp otyr. Іlki jobany iske asyrý aıasynda aýyldaǵy shaǵyn jınaqty mektepterde jekelegen pánderdi qashyqtan oqytý uıymdastyrylady», - dep jazady vıtse-premer.

Altaı Kólginovtiń málimeti boıynsha aýyl mektepterin tsıfrly formatta oqytýǵa kóshirý máselesi qarastyrylyp jatyr.

«Atap aıtqanda, jetekshi mektepterdiń úzdik pedagogteri shaǵyn jınaqty mektepterde strımıng (onlaın dáris) arqyly aptasyna 2 ret «Matematıka», «Fızıka», «Hımııa», «Bıologııa», «Aǵylshyn tili» pánderinen 20-25 mınýttyq onlaın dárister ótkizip, jańa sabaqtar oqytady.

Sondaı-aq «Tirek mektebi – magnıtti mektepter» jobasy arqyly (2-3 shaǵyn jınaqty mektepke bir tirek mektep bekitiledi) bilikti pedagogter 5-11-synyp oqýshylaryna aptasyna 2 ret «Matematıka», «Fızıka», «Hımııa», «Bıologııa», «Aǵylshyn tili» pánderinen 20-25 mınýttyq onlaın sabaqtar ótkizedi. Tirek mektebindegi pedagog «onlaın pedagogtiń» qyzmetin atqarsa, shaǵyn jınaqty mekteptiń pedagogi «onlaın pedagogtiń assıstenti» qyzmetin atqarady. Eki pedagog birlese otyryp, bilim alýshylardyń bilim sapasyn arttyrý maqsatynda birlese jumystar júrgizedi», - delingen jaýapta.