Aýyl muǵalimi «Bolashaq» baǵdarlamasymen AQSh ýnıversıtetiniń doktorantýrasyna tústi

NUR-SULTAN. QazAqparat – Almaty oblysynyń Jibek Joly aýylyndaǵy orta mekteptiń matematıka páni muǵalimi Marjan Erjan «Bolashaq» baǵdarlamasymen AQSh-ta doktorantýrada oqıtyn bolady. Bul týraly «Halyqaralyq baǵdarlamalar ortalyǵy» AQ málim etti, dep habarlaıdy QazAqparat.

Ortalyqtyń baspasóz qyzmeti taratqan aqparatqa sáıkes, «Bolashaq» stıpendıaty Ońtústik Kalıfornııa ýnıversıtetinde bilim salasyndaǵy basqarýdy zertteıdi.

«Ata-anamnyń jolyn qýyp, ustaz bolsam degen arman paıda boldy. Aýyl mektebinde matematıkadan sabaq beremin, kópbalaly otbasydan shyqqan balalarǵa aǵylshyn tilin tegin úıretemin. Ózim de aýyl mektebin bitirdim. Shetelde oqýǵa múmkindigim bolady dep oılamappyn. «Bolashaq» baǵdarlamasynyń arqasynda otandastarymyzǵa álemniń úzdik joǵary oqý oryndarynda akademııalyq bilim meńgerip, ǵylymı dáreje alýǵa múmkindik týdy. AQSh-tyń doktorantýrasyn bitirgennen keıin elimizdiń bilim salasyn damytýǵa óz úlesimdi qosqym keledi», - dep atap ótti Marjan Erjan.

«Bolashaq» halyqaralyq stıpendııasy júzege asyrylyp kele jatqan 29 jyl ishinde bilim salasy úshin 1 058 maman shetelde daıarlandy. Qazirgi tańda olar bastaýysh, orta, joǵary jáne joǵary oqý ornynan keıingi bilim berý uıymdarynda jumys isteıdi.

Eske sala ketsek, 14 qazanǵa deıin eGov.kz memlekettik qyzmetter portaly arqyly «Bolashaq» baǵdarlamasymen akademııalyq oqý men taǵylymdamadan ótýge qujattar qabyldanady.

Sondaı-aq, budan buryn «Bolashaq» halyqaralyq stıpendııasy ıegerleriniń tizimi jarııalanǵan bolatyn.