Aýyl kásipkerlerine kredıtpen birge ónimin satyp alý kepildigi beriledi - Eńbek mınıstri

NUR-SULTAN. QazAqparat – Aýyldaǵy kásipkerlikti damytý úshin turǵyndarǵa kredıtpen birge shyǵarǵan ónimin satyp alý týraly kepildikter berilmek. Bul týraly QR Eńbek jáne halyqty áleýmettik qorǵaý mınıstri Serik Shápkenov Úkimet otyrysynda aıtty, dep habarlady QazAqparat tilshisi.

«Atameken» ulttyq kásipkerler palatasymen birlesip, aýyl kásipkerligin damytý boıynsha sharalar kesheni ázirlenýde. Bul sharalar aýyldardyń master-josparlaryn qalyptastyrýdy, kásipkerlikke oqytýdy, ónimder men qyzmetterdi satyp alýǵa kepildik bere otyryp, jeńildetilgen kredıtter men granttardy qamtıtyn bolady», – dedi Serik Shápkenov.

Mınıstr jastardyń jumyspen qamtylýyna erekshe kóńil bólinetinin atady.

«Qazirgi ýaqytta Mınıstrlik jastardy jumyspen qamtýǵa baǵyttalǵan sharalardy júzege asyrýda – bul «Jastar praktıkasy» jáne «Alǵashqy jumys orny» jobalary. Atalǵan jobalardy kúsheıtý úshin jastardyń qatysý merzimi men jalaqy mólsheri ulǵaıtylady», – dedi Serik Shápkenov.

Sóz sońynda ol turaqty jumys oryndaryn qurý sharttarynyń biri – kásipkerlikti damytý ekenin eske saldy.

«Memleket basshysynyń tapsyrmasy boıynsha jeke isin damytýǵa arnalǵan grant mólsheri 200-den 400 aılyq eseptik kórsetkishke deıin (612,6 myńnan 1,2 mln teńgege deıin) ulǵaıtylady, sondaı-aq qarjylandyrýǵa úmitker bıznes-jobalardyń ataýlylyǵyn jáne baǵalanýyn kúsheıtý boıynsha sharalar kesheni qabyldanady», – dep túıindedi mınıstr.