Aýyl halqy koronavırýstyń ekinshi tolqynynda qysyltaıań jaǵdaıǵa tap bolady - Qýanysh Seıitjanov
«Jalpy, epıdemıologııalyq zańdylyqqa sáıkes, indet qalaǵa qaraǵanda aýylda kóp taramaýy tıis. Óıtkeni, aýylda halyq tyǵyz qonystanbaǵan, úlken ǵımarattar, úlken óndiris nysandary joq. Biraq, bizde kerisinshe jaǵdaı oryn aldy. Volonterlerimiz ben belsendilerimizdiń baıqaýynsha, aýyldyq jerlerde kóbine turǵyndary vahtalyq ádispen úlken óndiris oryndaryna baryp jumys isteıtin aýyldarda koronavırýs indeti órship ketken. Sondyqtan qazirden bastap osy úlken óndiris oryndarynda, qurylys kompanııalarynda sanıtarlyq baqylaý men aldyn alý sharalaryn kúsheıtpesek, onda kúzde bolady-aý degen koronavırýs indetiniń ekinshi tolqynynda aýyl turǵyndary qysyltaıań jaǵdaıǵa tap bolady», - deıdi Qýanysh Seıitjanov.
Onyń atap ótýinshe, koronavırýs indetiniń birinshi tolqyny kezinde aýyldaǵy aǵaıyn óz qotyryn ózi qasyp, sharasyzdyqtan em-domdy úıde alýǵa májbúr boldy. Sonymen qatar kúzgi oraq kezinde astyq bastyrý jumysyna jumyldyrylǵan jumysshylardyń aýyryp qalǵan jaǵdaılary kezdesedi. Munyń da aldyn alý qajet.
«Áıtpese, keler jyly nansyz qalýymyz múmkin. Aýyl - memleketimizdiń azyq-túlik qaýipsizdiginiń kepili. Sondyqtan qazirden bastap bul máselelerdi ótkir qozǵap, tıisti jerlerge jetkizýimiz qajet. Elimizdiń 14 óńirindegi 200-ge jýyq aýylǵa júrgizgen monıtorıngimizdiń negizinde Úkimetke usynys jasaımyz. Eń aldymen bul usynysta aýyldarda jabylyp qalǵan aýrýhanalar, ambýlatorııalar, feldsherlik-akýsherlik pýnkterdi memleket esebinen qaıtadan ashýǵa basa mán beremiz. Ol - kezek kúttirmeıtin másele. Osy jyldan bastap kirisip, buryn qalyp qoıǵan ǵımarattardy qalpyna keltirý qajet. Tipti, qazirden bastap keı aýyldarda aýrýhana qurylysyna kirisken jón. Óıtkeni, 2-3 myń turǵyny bar aýyldarda jalǵyz feldsher ne bitiredi?», - deıdi partııanyń apparat jetekshisi.
Sonymen qatar ol koronavırýs indetin juqtyryp alǵan aýyl turǵyndary PTR-testileýden de óte almaıtynyn aıtty.
«PTR-test negizinen úlken aýdan ortalyqtaryndaǵy provızorlyq aýrýhanalarda bolǵan. Biraq bárinde birdeı bar dep aıta almaımyz. Sondyqtan PTR-testileý aıasyn aýyldarǵa deıin keńeıtý qajet. Óıtkeni, aýyl halqy ózin-ózi emdep otyrǵandyǵyn jasyrmaı aıtýymyz kerek. Olardyń medıtsınalyq qyzmetke júginerlik jaǵdaıy bolǵan joq. Aýdan ortalyǵynan 300-400 shaqyrym shalǵaıda jatqan aýyl turǵyndarynyń ortalyqqa barýǵa jaǵdaıy da kelgen emes. Sondyqtan kóbi úıde emdeldi. Sondyqtan bolady-aý dep otyrǵan koronavırýs indetiniń ekinshi tolqyny kezinde jyljymaly medıtsınalyq kómek qyzmetin jolǵa qoıyp, onda PTR-test ótkize alatyndaı jaǵdaı jasaý qajet», - dedi ol.