Aýyl halqy dárigerge muqtaj bolmas úshin jańa memlekettik normatıv bekitildi

NUR-SULTAN. QazAqparat - Densaýlyq saqtaý mınıstrligi shalǵaı ornalasqan aýyl turǵyndary úshin medıtsınalyq kómektiń qoljetimdiligin arttyrý maqsatynda medıtsına uıymdary jelisiniń memlekettik normatıvine ózgerister engizdi, dep habarlaıdy QazAqparat.

Osy ózgeristerge sáıkes, endi halyq sany 50 adamǵa deıingi eldi mekender medıtsına qyzmetkerimen úıde qamtamasyz etiledi.

Turǵyndar sany 50-den 500 adamǵa deıingi aýyldarda medıtsınalyq pýnkter ashý, halyq sany 500-den 1500 adamǵa deıin (buryn 800-den 1500-ge deıin bolǵan) eldi mekenderde feldsherlik-akýsherlik pýnkter qurý kózdeledi.

Jeliniń jańa normatıvin engizý nátıjesinde 502 medıtsınalyq pýnkti FAP - qa, 185 dárigerlik ambýlatorııany MSAK ortalyqtaryna qaıta uıymdastyrý belgilengen.

Osy ózgerister aıasynda 500-den astam orta medıtsınalyq qyzmetker, feldsherler men akýsherler paıda bolady.

Halyq sany 1500-den 5000 adamǵa deıin (buryn 1500-den 10 000-ǵa deıin bolǵan) eldi mekenderde dárigerlik ambýlatorııalar ashylady, sondaı-aq 5000-nan astam turǵyn turatyn aýyldarda MSAK ortalyqtary ashylady.

Aýyl halqyna ýaqtyly shuǵyl medıtsınalyq kómek kórsetý, «altyn saǵat» qaǵıdatyn saqtaý jáne jańa medıtsınalyq tehnologııalardyń qoljetimdiligi maqsatynda kópbeıindi aýdanaralyq aýrýhanalar kópbeıindi ortalyq aýdandyq aýrýhanalar bolyp qaıta qurylady.

Túrlendirilgen KOAA bazasynda mynadaı qyzmetter jumys isteýi tıis: ınsýlt ortalyǵy, az ınvazıvti kardıologııalyq ortalyq (TKA ortalyǵy), medıtsınalyq ońaltý, travmatologııa jáne ortopedııa, hırýrgııa, reanımatsııa jáne qarqyndy terapııa bólimsheleri, perınataldy ortalyq nemese bosandyrý bólimshesi, trıaj júıesi bar qabyldaý bólimshesi, joǵary tehnologııalyq jabdyqpen (KT, MRT, angıograftar) jaraqtandyrylǵan táýlik boıy jumys isteıtin klınıkalyq zerthana.

Atalǵan medıtsınalyq uıymdar birneshe aýdannyń turǵyndaryna qyzmet kórsetetin bolady, bul shalǵaı aýdandar men aýyl turǵyndary úshin mamandandyrylǵan jáne joǵary tehnologııalyq medıtsınalyq kómektiń qoljetimdiligin qamtamasyz etedi.