Aýyl – el besigi jobasynda jumyspen qamtý boıynsha jospar joq – Albert Raý

NUR-SULTAN. QazAqparat – «Aýyl – el besigi» jobasynda turǵyndardy jumyspen qamtý boıynsha naqty jospar joq. Bul máseleni Májilistiń Ekonomıkalyq reforma jáne óńirlik damý komıtetiniń tóraǵasy Albert Raý kóterdi, dep habarlaıdy QazAqparat tilshisi.

«Aýyldardaǵy eń ózekti máselelerdiń biri – aýyl turǵyndaryn jumyspen qamtý jáne olardyń tabysyn arttyrý. 2020 jyldyń qorytyndysy boıynsha jalpy eldegi aýyldyq jerlerdegi jumyssyzdyq deńgeıi 4,8% bolǵan. Aýylda jumyspen qamtylǵandar sany 3,6 mln adamdy qurady jáne 2019 jylmen salystyrǵanda 2,7%-ǵa tómendeý bar. Bul rette ózin-ózi jumyspen qamtyǵandar sany shamamen 1,2 mln adamdy nemese ekonomıkalyq belsendi halyqtyń 34%-yn kórsetti. Aýylda ózin-ózi jumyspen qamtyǵan halyqty jáne jumyssyzdardy tartý boıynsha serpilis pen aıqyn josparlar joq», - dedi A. Raý Májiliste ótken «Úkimet saǵatynda».

Depýtat – «Aýyl – el besigi» jobasynda «Báıterek» holdıngi arqyly agrarlyq bıznesti qarjylandyrý, «Eńbek» jáne «Bıznestiń jol kartasy – 2025» arqyly nátıjeli jumyspen qamtýdy jáne jappaı kásipkerlikti damytý sharalary jazylǵanyn atap ótti.

«Bul tapsyrma qansha oryndalady álde bul jaı ǵana deklaratsııa ma? Bul óte mańyzdy suraq. Qalaǵa qaraǵanda jumyssyzdyq deńgeıi edáýir joǵary aýyl jastaryna basa nazar aýdarǵan jón. Sondyqtan qazir aýyl jastary kóbine jaqsy ómir izdep qalaǵa ketedi. Olardyń kásibı bilim deńgeıi jetkiliksiz jáne jaqsy jumysqa ornalasa almaıdy. Degenmen dál osyndaı jastardyń aýylda turyp, jumys istep, jaqsy tabys tapqan mysaldary da bar. Eńbek jáne halyqty áleýmettik qorǵaý mınıstrligi oblys ákimdikterimen birlesip, aýyldyq eldi mekenderde kásipkerlikti damytý jáne halyq tabysynyń ósýi jónindegi ulttyq jobanyń oryndalýyn qamtamasyz etýi qajet», - dedi ol.

Mysal retinde depýtat «Jambyl oblysy halqynyń tabysyn arttyrý» pılottyq jobasyn eske saldy.

«Memlekettik organdardyń habarlaýynsha, munda oń dınamıka bar: 2019 jylmen salystyrǵanda ataýly áleýmettik kómek alýshylar sany úsh esege azaıǵan, jobaǵa qatysýshylardyń ortasha tabysy 2,5 esege artqan, esh nátıjesiz ózin-ózi jumyspen qamtyǵandar sany azaıǵan. Árıne, múmkindik bolsa, osy tájirıbeni elimizdiń basqa óńirlerinde de taratý qajet», - dedi Albert Raý.

Aıta keteıik, Májilistegi Úkimet saǵatynda «Aýyl — El besigi» jobasy talqylanyp jatyr. Qazaqstannyń aýyldaryndaǵy 6 293 eldi mekende 7,8 mln adam turady.

2019 jyly elimizde «Aýyl – El besigi» baǵdarlamasy iske asyryla bastady. Onyń basty maqsaty — aýyldaǵy adamdardyń ómirin jaqsartý. Jol qurylysy, sýmen qamtamasyz etý, densaýlyq saqtaý, bilim berý, mádenıet, sport nysandaryn qaıta jańartý jáne jańa nysandar salý, jumys oryndaryn qurý — osynyń barlyǵy atalǵan baǵdarlamany iske asyrýdy kózdeıdi.

Buǵan deıin Albert Raý «Aýyl – el besigi» jobasy úsh jylda 18 paıyzǵa ǵana oryndalǵanyn, jobanyń sapaǵa emes, sanǵa umtylyp otyrǵanyn synaǵan edi.