Aýyl – el besigi: Túrkistan oblysynyń Keles aýdanynda 25 nysan jóndeledi

KELES. QazAqparat – Túrkistan oblysynyń Keles aýdanynda «Aýyl – el besigi» memlekettik baǵdarlamasy aıasynda barlyǵy 23 ishki kóshe jóndelip, ortalyq stadıon men aýdandyq mádenıet úıi tolyq qaıta jańǵyrtylatyn bolady. Bul 25 nysanǵa respýblıkalyq bıýdjetten 1 mlrd 229,3 mln teńge qarjy bólindi. Bul týraly Túrkistan oblystyq Óńirlik kommýnıkatsııalar qyzmetiniń kóshpeli brıfınginde Keles aýdanynyń ákimi Aqmentaı Esbaev málim etti, dep habarlaıdy QazAqparat tilshisi.

Sonymen qatar, aýdan basshysy aımaqta óndirilgen jalpy ónim kólemi aǵymdaǵy jyldyń 8 aıynda 30,9 mlrd teńgege jetkenin baıandady. «Kirister boıynsha 2019 jyldyń 8 aıynda jergilikti bıýdjetke túsetin salyqtar men basqa da túsimderdiń jospary 96,8% oryndaldy. Al osy merzimde belsendi shaǵyn jáne orta sýbektiler sany 8500-ge jetip, onda jumys isteıtin adamdar sany 18,1 myń adamdy qurady. «Indýstrıaldy-ınnovatsııalyq damý» memlekettik baǵdarlamasy sheńberinde, kásipkerlikti qoldaý kartasy aıasynda jalpy quny 327,4 mln teńgeni quraıtyn eki jobany 2019 jyly iske qosý josparlanǵan. 2018 jyly quny 250 mln teńge bolatyn 1 joba iske asyrylyp, 50 jumys orny ashyldy», - dedi Aqmentaı Esbaev.

Aýdan basshysy sondaı-aq, 4 mlrd 323,1 mln teńgege 27 nysannyń qurylysy júrgizilgenin atap ótti. Máselen, bilim salasynda - 2, tabıǵı gazben qamtýda - 1, aýyz sýmen qamtýda - 13, sapaly elektr qýatymen qamtýda - 11 nysan salynǵan. Onyń ishinde 4 jańa nysannyń qurylysy búginde paıdalanýǵa berilgen.

«Infraqurylym boıynsha eldi mekenderge shaqqanda Keles aýdanynda tabıǵı gazben qamtý úlesi – 65%, aýyz sýmen qamtý – 54,4% bolsa, sapaly elektr qýatymen qamtý – 65% jetken. Bul baǵyttaǵy jumystar áli de jalǵasyn tabatyn bolady. Sondaı-aq, 2020 jylǵa qaraı 43,9 shaqyrymdy quraıtyn aýdannyń 30 ishki kóshelerin jóndeý josparlanýda», - dedi Keles aýdanynyń ákimi.