Aýyl – el besigi: ShQO-da 81 joba júzege asyryldy

ÓSKEMEN. QazAqparat – Shyǵys Qazaqstan oblysynda «Aýyl – el besigi» baǵdarlamasy aıasynda 81 joba júzege asyryldy, dep habarlaıdy QazAqparat tilshisi.

ShQO ákimdiginiń málimetine súıensek, «Aýyl – el besigi» jobasy boıynsha óńirdegi 116 tirek aýylda túrli jumystar júrgizilgen. 2019-2020 jyldary 20 tirek aýylda 10 mlrd teńgeden astam somaǵa 56 joba iske asyryldy. Osylaısha, aýyldaǵy 107 myń adamnyń ómir súrý sapasy jaqsardy.

Jobalarǵa sáıkes 9 áleýmettik nysan salynyp, 32 nysan jóndeýden ótti. 150 shaqyrym kentishilik joldar jóndeldi. Atqarylǵan jumystardyń arqasynda 784 jumys orny quryldy.

«2021 jyly 44 tirek aýylda jáne 93 basqa da eldi mekenderde atalǵan baǵdarlama boıynsha 9 mlrd teńge bólindi. Nátıjesinde, 4 nysannyń qurylysy bastalyp, densaýlyq saqtaý, bilim jáne mádenıet salasyndaǵy 13 áleýmettik nysanǵa kúrdeli jóndeý júrgizildi. 32 aýylda jaryqtandyrý júıesi jańartylyp, 156 shaqyrym kentishilik joldar jóndeýden ótti», - delingen aqparatta.

Ótken jyldyń qorytyndysy boıynsha 81 joba aıaqtalǵan. Qalǵan 12 joba 2022 jyly jalǵasyn tappaq.