Aýyl – el besigi: ShQO-da 52 joba júzege asyrylýda
Bul týraly Shyǵys Qazaqstan oblysynyń ákimi Danıal Ahmetovtiń tóraǵalyǵymen ótken ákimdik otyrysynda aıtyldy. Atalmysh baǵdarlama aıasyndaǵy alǵashqy jobalar ótken jyly tórt aýdanda bastalǵan bolatyn. Nátıjesinde Kókpekti aýdanynda dene shynyqtyrý-saýyqtyrý kesheni, Úrjar men Kúrshim aýdandarynda jańa basseınder salyndy. Jaqynda Glýbokoe aýdanynda Mádenıet úıi paıdalanýǵa berilgen.
«Jyl basynan beri 52 joba júzege asyrylýda. Búgingi tańda 46 joba aıaqtalyp, qalǵandary kelesi jyly máresine jetpek. Olar: Kúrshim aýdanynyń Qaljyr aýylyndaǵy sport modýliniń qurylysy, Jarma aýdanynyń Áýezov kentindegi Mádenıet úıi, Katonqaraǵaı aýylyndaǵy dene saýyqtyrý kesheni jáne Katonqaraǵaı aýdany Úlken Naryn aýylyndaǵy ortalyq aýrýhana ǵımaratynyń jóndeý jumystary», - dedi ShQO ekonomıka jáne bıýdjettik josparlaý basqarmasynyń basshysy Sáýle Ulaqova.
Búgingi tańda Katonqaraǵaı aýdanynda tórt mektepke, mádenıet úıine, sondaı-aq kóshelerge kúrdeli jóndeý jumystary júrgizildi. Kúrshim aýdany Marqakól aýylyndaǵy balabaqshaǵa, aýrýhanaǵa kúrdeli jóndeý júrgizilgen. Úrjar aýdany Maqanshy aýylynda sport modýli salynyp, Altynshoqy jáne Sholpan aýyldaryndaǵy mektepterde kúrdeli jóndeý jumystary aıaqtaldy. Tarbaǵataı aýdanyndaǵy Tuǵyl jáne Aqjar aýyldaryndaǵy mektepter men mádenıet úılerinde kúrdeli jóndeý jumystary máresine jetken.
«Shekara mańyndaǵy aýdandardyń áleýmettik-ekonomıkalyq damýy halyqtyń kóshi-qon aǵynyn toqtatady. Sondyqtan «Aýyl – el besigi» baǵdarlamasy jáne shekara mańyndaǵy aýdandardy damytýdyń keshendi jospary aıasynda mejege alynǵan barlyq jobalardy joǵary deńgeıde iske asyrý asa mańyzdy», – dedi Danıal Ahmetov.
Aıta keteıik, kelesi jyly óńirdegi 20 tirek aýylda 25 jobany iske asyrý josparlanǵan.