«Aýyl – el besigi»: Mańǵystaý oblysynda 82 kóshege asfalt tóseldi

NUR-SULTAN. QazAqparat - Mańǵystaýda «Nurly jol» baǵdarlamasynyń aıasynda quny 26,3 mlrd teńgeniń 9 ınfraqurylymdyq jobasy iske asyrylyp jatyr. Bul týraly Mańǵystaý oblysynyń ákimi Serikbaı Trumov OKQ ótken brıfıngte aıtty, dep habarlaıdy QazAqparat.

Sondaı-aq, óńir turǵyndarynyń kópten beri kóterip júrgen máseleleriniń biri - qala jáne aýylishilik joldardy kúrdeli jóndeýden ótkizý bolatyn. Bıyl osy máseleni sheshýge múmkindik týdy. Nátıjesinde 10 aıdyń ishinde 161 shaqyrymdy qamtıtyn 2 joba aıasynda avtomobıl joldarynyń rekonstrýktsııasy aıaqtaldy. Onyń ishinde 64 shaqyrymdy quraıtyn respýblıkalyq mańyzdaǵy «Jetibaı – Jańaózen», oblystyq mańyzdaǵy 97 shaqyrym «Ata joly» avtomobıl joly bar.

Sondaı-aq, bıyl 477 shaqyrymdy quraıtyn oblystyq jáne aýdandyq, aýylishilik joldardyń qurylysy men ortasha jóndeý jumystary júrgizilýde.

«Aýyl – el besigi» baǵdarlamasynyń kómegimen Beıneý aýdanynda 44 kóshege, Mańǵystaý aýdanynda 13 kóshege, Túpqaraǵan aýdanynda 25 kóshege asfalt tóseldi.

«Jumyspen qamtýdyń jol kartasy -2020» baǵdarlamasy arqyly Aqtaý qalasynyń shaǵyn aýdanishilik joldary jóndeýden ótti. Atap aıtqanda, 6 birdeı shaǵyn aýdandaǵy 136 myń sharshy metr jol jóndeldi. Bul da aqtaýlyqtardyń kópten beri kóterip júrgen máseleleriniń biri edi», -dedi oblys ákimi Serikbaı Trumov.