Aýyl – el besigi: Qostanaı oblysynda 5 aýylǵa gaz tartylady
Oblys ákiminiń baspasóz hatshysy Saıat Júsipovtiń sózinshe, «Aýyl – el besigi» jobasy sheńberinde Áýlıekól, Borovskoe, Qarasý, Sarykól jáne Fedorov aýyldarynda 74 joba iske asyrylady. Atap aıtqanda, álýmettik sala obektileri (mektepter, mektep janyndaǵy ınternattar, balabaqshalar, qosymsha bilim beretin uıymdar, mádenıet úıleri, kitaphanalar, stadıondar, aýdandyq aýrýhanalar) kúrdeli jáne aǵymdaǵy jóndeýden ótip, aýylishilik joldar qalypqa keledi.
«Atalǵan eldi mekenderde «Aýyl – el besigi» qarajatynan basqa, ózge de memlekettik baǵdarlamalar esebinen 4 mlrd teńgege jýyq ınfraqurylymdyq jobalar iske asyrylýda. Negizinen erekshe baqylaýda turǵan turǵyn úı qurylysy, aýyldardy gazdandyrý jáne sapaly aýyzsýmen qamtamasyz etý basty nazarǵa alynady. Atalmysh 5 aýylǵa gaz tartý jumystary bastalyp ketti. Al ortalyqtandyrylǵan sýmen jabdyqtaý 59,5%-ke jetti», - deıdi Saıat Júsipov.
Qostanaı oblysynda «Óńirlerdi 2020 jylǵa deıingi damytýdyń» memlekettik baǵdarlamasy boıynsha bıyl 24 aýylǵa sýmen jabdyqtaý obektileri júrgizildi. Jitiqara aýdanynyń Zabelevka aýyly, Sarykól aýdanynyń Zlatoýst aýyly, Beıimbet Maılın aýdanynyń Novoılınovka aýyly, Arqalyq qalasynyń Vostochnoe aýylynyń turǵyndary sapaly aýyz sý iship otyr.