Aýyl – el besigi: Qostanaı oblysynda 153 bilim nysany jóndeledi

QOSTANAI. QazAqparat – Qostanaı oblysynda birneshe mektep kúrdeli jóndeýden ótedi. Bul týraly oblys ákimdiginde ótken jıynda bilim basqarmasynyń basshysy Vasılıı Tsymbalıýk málim etti, dep habarlaıdy QazAqparat.

Bıyl óńirde bilim salasy nysandaryn kúrdeli jóndeýden ótkizýge basymdyq beriledi. Olardy qarjylandyrý Jumyspen qamtý jol kartasy, «Aýyl - El besigi» baǵdarlamasy sheńberinde jáne jergilikti bıýdjet qarajaty esebinen júrgiziledi. Úsh mektep salynyp, 153 bilim nysany qalpyna keltiriledi. Olardyń 30-y kúrdeli jóndeýden ótedi. Eń iri joba Qarasý aýdanyna tıisili. Qarasý aýylynda jalpy quny 1,3 mlrd teńge bolatyn memlekettik tilde oqytatyn orta mekteptiń qurylysy bastalmaq. Ol 320 oryndyq apatty mekteptiń ornyna salynady.

«Jumyspen qamtýdyń jol kartasy mindetterin júzege asyrý sheńberinde QR Bilim jáne ǵylym mınıstrligimen kelisip, 2020 jyly qurylysy bastalatyn bilim nysandarynyń tizimin jasadyq. Tizimge quny 9,2 mlrd teńge bolatyn 35 ınfraqurylymdyq joba engizildi. Onyń ishinde 4,5 mlrd teńge – ishki qaryzdar esebinen jáne 4,7 mlrd teńge respýblıkalyq bıýdjet transfertterinen alynady. 15 kúrdeli jóndeý nysany boıynsha memlekettik satyp alý rásimderi júrgizilýde. Baǵdarlama aıasynda 2300 ýaqytsha jumys ornyn qurý josparlanyp otyr. Buǵan qosa jumyspen qamtý ortalyqtarynyń joldamalary boıynsha 1156 jumyssyz jasqa kómektesemiz», - dedi basqarma basshysy.

Oblystaǵy 11 mektep aǵymdaǵy jóndeýge alynady. Vasılıı Tsymbalıýk ýáde etkendeı, bul jumystar aldaǵy 3 aıda aıaqtalady. Barlyǵy 554 mln teńge qarastyrylǵan.