Aýyl - el besigi: Qaraǵandy oblysynda 47 joba júzege asyrylady
Joba aıasynda myńnan astam jumys ornyn qurylyp, 47 jobany iske asyrýǵa qarajat bólingen. Aýyldyq mektepter, mádenıet úıleri, kentishilik joldar, sý qubyrlary jáne basqa da nysandar jóndeletin bolady.
Arnaıy jobany júzege asyrý barysy selektorlyq rejımde ótken apparattyq jınalys kezinde talqyǵa tústi. Oblys ákimi Jeńis Qasymbek jumysty qarqyndatý jáne bólingen qarjyny tıimdi paıdalaný jóninde tapsyrma berdi.
«Elbasy – Tuńǵysh Prezıdenttiń bastamasy boıynsha «Aýyl - el besigi» arnaıy jobasy júzege asyrylýda. Onyń maqsaty - áleýmettik jáne ınjenerlik ınfraqurylymdy damytý jáne aýylda qolaıly jaǵdaı jasaý. 2019 jyly Qaraǵandy oblysynda úsh aýdan ortalyǵynda – Atasý, Nura jáne Ulytaýda 26 joba júzege asyryldy», - dep málimdedi ekonomıka basqarmasynyń basshysy Azamat Muqanov.
Bul jobalardyń jartysy áleýmettik salaǵa tıesili, dep atap ótti ol. Sondaı-aq qazandyqtar, tazartý nysandary jóndeldi. Aýdan ortalyqtarynda jol jaqsaryp, kósheler jaryqtandyryldy.
2020 jyly Qaraǵandy oblysynda «Aýyl - el besigi» arnaıy jobasyn jalǵastyrýǵa respýblıkalyq bıýdjetten 4,7 mlrd teńge bólindi, dep habarlady Azamat Muqanov. Onyń aıtýynsha, Aqtoǵaı, Buqar jyraý, Qarqaraly, Nura, Osakarov, Ulytaý jáne Shet aýdandarynyń 13 eldi mekeninde 47 joba júzege asyrylady.
Nysandardyń bir bóligi boıynsha konkýrs ótkizilip, merdigerler anyqtaldy, dep habarlady basqarma basshysy.
Jeńis Qasymbek bul baǵytta belsendirek bolýdy talap etti.
«Qurylys kezeńi bastaldy. Bul adamdarǵa jumys berýge, olardy eńbekaqymen qamtamasyz etýge múmkindik beredi. Bul bizdiń turǵyndarǵa úlken qoldaý. Konkýrstyq, sharttyq bolsyn barlyq rásimderdi jedel aıaqtaý qajet. Mamyr aıynda barlyq jobalar boıynsha jumysqa kirisý kerek», - dep atap ótti oblys ákimi.
Qazaqstanda «Aýyl - el besigi» arnaıy jobasy 2022 jylǵa deıin jalǵasady.