Aýyl – el besigi: Almaty men Ulytaý oblystary qarjyny baıaý ıgerýde

ASTANA. QazAqparat – Ulttyq ekonomıka mınıstri Álibek Qýantyrov «Aýyl – el besigi» memlekettik baǵrlamasy boıynsha bıylǵa bólingen qarjynyń alǵashqy jartyjyldyqta ıgerilýi týraly aıtty, dep habarlaıdy QazAqparat tilshisi.

«Ákimdikter bıýdjet qarajatynyń 27% ıgergen. Qarajattyń joǵary ıgerilýi Pavlodar, Aqtóbe, Qyzylorda oblystarynda baıqalady. Sonymen qatar eń tómen ıgerilý Almaty jáne Ulytaý oblysynda tirkeldi.

Jalpy qazirgi tańda, 1 600 joba boıynsha konkýrs ótkizilip, 158 joba aıaqtaldy. Óńirler bólinisinde jobalardy aıaqtaý kórsetkishi Jambyl, Pavlodar, Shyǵys Qazaqstan oblystarynda joǵary», - dedi ol.

Mınıstrdiń sózine qaraǵanda, 2022 jylǵy óńirlik standarttarǵa saı ınfraqurylymmen qamtylǵan aýyldardyń sany artyp keledi.

«Mundaı aýyldardyń sany 786-ǵa jetti. Bul 2021 jylmen salystyrǵanda 525 aýyldyq eldi mekenge kóp. Elimizdegi aýyldyq aýmaqtarda turatyn 7,5 mln halyqtyń, 3,2 mln turǵyny óńirlik standarttarmen qamtamasyz etilý deńgeıi joǵary aýyldarda turatynyn atap ótken jón», - dedi Álibek Qýantyrov.