«Aýyl – El besigi»: Aqmola oblysyndaǵy úsh eldi mekende 31 joba júzege asyryldy

KÓKShETAÝ. QazAqparat - «Aýyl – El besigi» aıasynda Aqmola oblysynyń úsh aýylynda 31 joba júzege asyryldy. Bul týraly Kókshetaýda «Aýyl» halyqtyq-demokratııalyq patrıottyq partııasynyń Aqmola oblystyq fılıaly «Ulttyq qundylyqtar – El bolashaǵy» taqyrybynda ótkizgen dóńgelek ústel barysynda aıtyldy, dep habarlaıdy QazAqparat tilshisi.

«Aýyl» partııasy usynǵan «Ulttyq qundylyqtardy damytý tujyrymdamasynyń» negizgi baǵyttary talqylanǵan sharaǵa Aqmola oblysynyń mádenıet jáne óner qaıratkerleri, sondaı-aq «Aýyl» HDPP Saıası keńesiniń músheleri qatysty. Kezdesýde óńirdegi zııaly qaýym ókilderiniń ulttyq qundylyqtardy damytý baǵytyndaǵy jumysty jaqsartý boıynsha usynystary saralanady.

Aqmola oblystyq «Rýhanı jańǵyrý» joba keńsesiniń basshysy Maral Jaqypovanyń aıtýynsha, óńirde «Aýyl – El besigi» jobasyn júzege asyrý sheńberinde halyq sany 21 myń adamnan asatyn aýdan ortalyqtary bolyp tabylatyn perspektıvti 3 aýyldyq eldi meken irikteldi. Astrahanka aýyly men Arshaly kenti «Ekaterınbor-Almaty» kúre jolynyń boıynda ornalasqan bolsa, Zerendi aýyly týrıstik ortalyq bolyp sanalady. Atalǵan aýyldarda 3,1 mıllıard teńgege 31 joba júzege asyryldy. Onyń ishinde kólik ınfraqurylymy salasynda 10 joba, áleýmettik qamsyzdandyrý boıynsha 12 joba jáne 9 joba turǵyn úı-kommýnaldyq sharýashylyq salasynda.

«Arshaly kentinde balalar shyǵarmashylyǵy ortalyǵy, №2 orta mektep, «Svetlıachok» balabaqshasy, sý qubyry jáne jylý jelileri (4 joba), kósheni jaryqtandyrý jáne kóshe-jol jelisi jóndeldi. Astrahanka aýylynda balalar-jasóspirimder sport mektebine, №6 Agrotehnıkalyq kolledjine (4 joba), shyǵarmashylyq úıine, aýdandyq mádenıet úıine, trotýarlar men kóshe-jol jelisine jóndeý júrgizildi, sýmen jabdyqtaý júıesi qaıta jańartyldy. Zerendi aýylynda kóshe-jol jelisine (7 joba), mádenıet úıine, sý qubyry jelilerine jóndeý júrgizildi, ortalyq qazandyqta qazandyq agregattaryn aýystyrý jáne ornatý jumystary jasaldy», - dedi Maral Jaqypova.

Osy rette, «Aýyl» HDPP Saıası keńesiniń múshesi Dáýletkereı Kápuly Aqmola oblysynda «Ulttyq qundylyqtardy damytý tujyrymdamasynyń» negizgi baǵyttary oıdaǵydaı júzege asyrylyp otyrǵandaǵyn, aldaǵy ýaqytta áli de birshama jumystar júrgizilý kerektigin atap ótti.

«Elbasynyń «Rýhanı jańǵyrýy» - ol qazaq halqy joǵalǵan túgendep, kem-ketigin toltyryp alsyn dep qolǵa alynǵan baǵdarlamasy. Degenmen, keıde ony naýqanǵa aınaldyryp, rýhanı jańǵyrýǵa qatysy joq sharalardy ótkizip jatamyz. Bul árıne, durys emes. Osy rette bizdiń «Aýyl» partııasy «Ulttyq qundylyqtardy damytý tujyrymdamasynyń» negizgi baǵyttaryn usynyp otyr. Búgingi bizdiń rýhanı qundylyqtarymyz barlyǵy osy «Ulttyq qundylyqtardy damytý tujyrymdamasynda» kórsetilgen. Sony nasıhattap, urpaǵymyzdyń boıyna sińirý basty mindetimiz», - dedi Dáýletkereı Kápuly.