Aýyl balalarynyń sportqa qyzyǵýshylyǵy erekshe - qyzylordalyq bapker

QYZYLORDA. QazAqparat - Búginde elimizde sporttyń damýyna úlken qamqorlyq jasalyp keledi. Nátıjesinde jer-jerde talantty jastar ózderiniń múmkindigin kórsetip, san alýan saıysta top jarýǵa múmkindik aldy. Osyndaı sergektikti serik etken jastarǵa tálim berip, olardyń sportqa qyzyǵýyna qoddaý bildirip júrgen bapkerler barshylyq. Aýylda júrip-aq úlken jetistikterge jol ashyp júrgen bilikti mamandardyń eńbegi qashanda qoldaýǵa turarlyq. Qazalylyq boks bapkeri Azamat Qutpanbetov daıyndaǵan shákirtter qazir respýblıkalyq básekelerde top jaryp júr. QazAqparat tilshisi jas mamanmen Sport kúni qarsańynda az-kem áńgimelesken edi.

- Aldymen óziń jaıly aıta ketkeniń artyq bolmas.

- Men Qazaly aýdany Bekarystan bı aýylynda 1990 jyly dúnıege kelgenmin. Mektep qabyrǵasynda júrgende qazaqsha kúrespen aınalystym. Keıinnen osy qyzyǵýshylyq meni sportqa alyp keldi.

Qyzylorda qalasyndaǵy «Bolashaq» ýnıversıtetine oqýǵa qabyldanyp, stýdent kezinde kıkboksıngke den qoıdym. Talaı talantty bapkerdiń aldyn kórip, tálimin aldym. Kıkboksıngten respýblıkalyq, oblystyq jarystardyń júldegeri atandy.

Bilim ordasynda júrgende jattyqtyrýshylyqtyń da qyr-syryn meńgerdim. Bul – men úshin úlken tájirıbe boldy. 2010 jyly atalǵan bilim ordasynan deneshynyqtyrý páni mamandyǵyn alyp shyqtym.

- Bapkerlik qyzmetke qaı kezden bastap bet burdyń?

- Sol jyldan bastap ol týǵan topyraqtaǵy aýyl mektebinde bapkerlik jumysqa kiristim. Shákirt tárbıeledim. Qazir shákirtterim joǵary jetistikterge qol sozyp keledi. Olardyń arasynda Jadyrasyn Sábıt, Nurlybek Hamıt, Erjan Ótemis jáne Jannur Ádilbek bar. Olar bokstan jasóspirimder arasyndaǵy QR chempıonatynda top jardy.

2015 jyly Áıteke bı kentindegi №17 olımpıadalyq rezervtiń mamandandyrylǵan balalar-jasóspirimder mektebine boks bapkeri qyzmetine ornalastym.

Munda onyń Ońtalap Erhan, Madııar Qalıjanuly sekildi shákirtterim respýblıkalyq ashyq týrnırlerde de joǵary tabysqa qol jetkizdi.

- Aýyldyq jerlerde sportty damytýǵa qanshalyqty kóńil bólinip otyr?

- Qazir elimizde sporttyń damýyna barynsha qolaıly jaǵdaı týyp otyr. Syr óńirinde qazir árbir aýylda sport keshenderi boı kóterip jatyr. Memlekettik-jekemenshik áriptestik aıasynda boı kótergen sol ǵımarattarda qanshama shákirt tálim alýǵa múmkindik týdy.

Keleshekte olardyń qatary kóbeıedi degen oıdamyn. Atalǵan ǵımarattardyń materıaldyq-tehnıkalyq bazasy jaqsardy. Bul biz sekildi jergilikti mamandardy qýantady.

- Jalpy, aýyl balalarynyń sportqa qyzyǵýshylyǵy qandaı?

- Sport mektebindegi balalardyń judyryqtasý ónerine degen ynta-peıili erekshe. Jattyǵýdan qalmaıdy. Tapsyrmany da tyńǵylyqty oryndap otyrady. Osyndaı júıeli jumys bolǵanda ǵana nátıje kútýge bolady.

- Áńgimeńe raqmet. Aldaǵy isterińe sáttilik tileımin.