Aýyl-aımaqtardy damytýǵa basymdyq beriledi - Túrkistan oblysynyń ákimi
Óńir basshysy Saryaǵash aýdanyn damytýǵa erekshe kóńil bólingenin jáne bul jumystardyń ári qaraı jańa qarqynmen jalǵasatynyn jetkizdi. Óńirdiń áleýmettik-ekonomıkalyq damýy men atqarylǵan jumystar jaıly baıandady. Sonymen birge, Memleket basshysy Qasym-Jomart Toqaevtyń qyrkúıek aıyndaǵy Qazaqstan halqyna arnaǵan Joldaýyna sáıkes atqarylatyn jumystarǵa toqtaldy.
«Ákimniń mindeti – halyqpen kezdesý, eldiń jaıyn bilý. Óziniń quzyreti aıasynda máselelerdi sheshý úshin sharalar qabyldaý. Barlyq jumystar mańyzdylyǵyna baılanysty kezeń-kezeńimen júzege asady. Sondyqtan, qurǵaq ýáde bere almaımyn. Kóterilgen máseleler oryndy. Aýdandy damytý jumystary jalǵasady», - dedi Darhan Satybaldy.
Keles aýdany turǵyndarymen kezdesýde jáne jeke qabyldaý barysynda úı salýǵa jer berý, kitaphana men sport keshenin salýǵ jumyssyzdyq jáne ózge de máseleler kóterildi. Óńir basshysy usynystar oryndy ekenin, olar nazarǵa alynatynyn atap ótti.
«Aýyl sharýashylyǵy salasyn Keles aýdanynyń brendine aınaldyrýǵa bolady. Óıtkeni, munda egin men mal sharýashylyǵyn damytýǵa barlyq múmkindik bar. Osynda óstik, bala kezde tańǵy 7-den bastap malǵa sý berip, qorany tazalap, baqshamyzda túrli daqyldar egip óstik. Bir jylda 2-3 ónim alynatyn. Osy úrdis jalǵasýy tıis. Aýyl sharýashylyǵyn damytýǵa qatysty jobalardy tolyq qoldaımyn. Mal sharýashylyǵymen aınalysatyn 25 sharýa qojalyǵy men kásiporyndardyń tizimi bekitilip, Ózbekstanǵa et eksporttaýǵa ruqsat alyndy. Kelestik sharýalardy da osy tizimge qosyp, et eksportyn ulǵaıtýǵa múmkindik mol. Sport keshenin, oqýshylar saraıyn, kitaphana salý máselesin de qarastyramyz. Bul aımaqtyń máselelerin jaqsy bilemin. Jalpy, óńir turǵyndarynyń 80 paıyzǵa jýyǵy aýyl-aımaqtarda turady. Sondyqtan, endi aýdandarǵa, aýyldarǵa qoldaý kúsheıtiledi», - degen Darhan Satybaldy Keles ózenindegi zańsyz karer qazýshylardyń jumysyn toqtatý, sıntetıkalyq dárige qarsy kúresti kúsheıtý jóninde jaýaptylarǵa tapsyrma berdi.
Oblys basshysy Saryaǵash pen Keles aýdanyndaǵy qordalanǵan máseleler boıynsha arnaıy jınalys ótkizip, sheshý joldaryn qarastyratynyn jetkizdi.
Іssapar barysynda D. Satybaldy eki aýdandaǵy birneshe kásiporyn men sharýa qojalyǵyn aralap kórdi. Sharýalar men kásipkerlerdiń ótinishterin tyńdap, kásipkerlikke qoldaý kúsheıtiletinin aıtty.