Aýyl, aýdan jáne qala mártebesin berý standarty ázirlenedi

NUR-SULTAN. QazAqparat – Elimizde aýyl, aýdan jáne qala mártebesin berý standarty ázirlenedi. Bul týraly QR Ulttyq ekonomıka mınıstrligi Óńirlerdi taldaý jáne jergilikti ózin-ózi basqarýdy damytý departamenti dırektorynyń orynbasary Mırjan Imanbaev málim etti, dep habarlaıdy QazAqparat tilshisi.

«Aýyl, aýdan jáne qala mártebesin berý talaptary qaıta qaralady. Mysaly, qala mártebesi berý úshin onda turatyn halyqtyń sany 10 myńnan kem bolmaýy tıis, al bizde halyq sany 10 myńǵa jetpeıtin qalalar bar. Nemese halqy 10 myńnan asady biraq aýyl mártebesi berilgen jaıt ta kezdesedi. Mine osy máselerdi sheshý úshin, talaptardy qaıta qarap, jańa standart daıyndalady. Standartta halyqtyń sanynan bólek, aýylda nemese aýdanda qandaı ınfraqurylym bolýy tıis, onyń damý kórsetkishi tolyq kórsetiledi. Qalalarda deńgeıine qaraı 3-ke bólinedi, aýdandyq mańyzy bar qala, oblystyq jáne respýblıkalyq mańyzy bar qala», - dedi M. Imanbaev.

Onyń aıtýynsha, aýdandyq mańyzy bar qalada halyqtyń sany 10 myńnan kem bolmasa, oblystyq mańyzy bar qalada kemi 50 myń adam turýy tıis.

«Bıýdjet berilgen mártebege sáıkes belgilenedi. Árıne aýylǵa qaraǵanda aýdan men qalanyń bıýdjeti molyraq. Elimizde aýyl, aýdan jáne qala mártebesin berý talaptaryna taldaý jasaý kelesi jyly qolǵa alynady. Al standarttyń ózi 2023 jyly qabyldanady dep josparlanyp otyr», - deıdi ol.

Buǵan deıin Ulttyq ekonomıka mınıstrliginiń ókili elimizde aýyl ákimdigi apparatynyń qyzmetin uıymdastyrý qaıta qaralatynyn aıtty.