«Aýyl amanaty» jobasyna 1 trln teńge bólinedi – Álıhan Smaıylov
«Agroónerkásip kesheninde 536 mlrd teńgeni quraıtyn 300-ge jýyq joba iske asyrylýda. Kóktemgi egis jáne egin jınaý jumystaryna jeńildetilgen kredıt berý kólemi bıyl 140 mlrd teńgege deıin ulǵaıtyldy. Aýyl sharýashylyǵy tehnıkasyna jeńildikpen kredıt berý 145 mlrd teńgege jetti. Jeńildetilgen baǵamen egis jumystaryna 419 myń tonna dızel bólindi. Sonymen qatar egin jınaýǵa qosymsha 400 myń tonna arzandatylǵan dızel otyny qarastyrylǵan», - dedi Úkimet basshysy.
Sondaı-aq Premer-Mınıstr bıyl memleket menshigine qosymsha 5 mln gektar aýylsharýashylyq jerleri qaıtarylatynyn atap ótti.
«Aýyldyq aýmaqtardaǵy áleýmettik, ınjenerlik jáne kólik ınfraqurylymdaryn jańǵyrtýǵa basa nazar aýdarylyp otyr. Aýyl halqynyń tabysyn arttyrý úshin «Aýyl amanaty» jobasy iske asyrylýda. Sonyń sheńberinde mıkrokredıt berý jáne kooperatsııany keńeıtý kózdelip otyr. Bıyl 100 mlrd teńge bólindi. Joba 7 jyl ishinde 1 mln-nan astam aýyl turǵynyn qamtıdy. Oǵan jalpy 1 trln teńge qarastyrylady», - dedi Álıhan Smaıylov.
Aıta keteıik, aýyl turǵyndarynyń ál-aýqatyn jaqsartý jáne áleýmettik máselelerin jedel sheshý maqsatynda Úkimet «AMANAT» partııasymen birlesip, búkil Qazaqstan boıynsha «Aýyl amanaty» jobasyn iske qosty. «Aýyl amanaty» jobasynyń basty maqsaty – aýyldy jerlerdegi halyqtyń tabysyn arttyrý. Baǵdarlama 2023-2025 jyldarǵa arnalǵan. Onyń aıasynda halyqqa jeńildikpen nesıeler beriledi. Bul rette óńdeý salasyna qatysty jylyjaılar, sút, et óndirisi, qus jáne balyq sharýashylyǵy sekildi jobalar, ósimdik sharýashylyǵyn, mal sharýashylyǵyn damytý, aýyl sharýashylyǵy kooperatıvterin jabdyqtaý jáne basqa baǵyttaǵy bıznes jobalardy qarjylandyrý kózdelgen. Shaǵyn nesıe alý úshin ótinim berýshi jeke kásipker bolyp tirkelýi kerek.