«Aýyl amanaty» jobasy kásipkerge qandaı múmkindik beredi
Aqtóbe oblysy ákiminiń baspasóz qyzmeti «Aýyl amanaty» jobasynyń múmkindikteri týraly málimet usyndy.
«Aýyl amanatynyń» aıasynda qolǵa alynyp otyrǵan irgeli jobalardyń biri – «Taýarly nesıe» baǵdarlamasyna aýyl turǵyndarynyń suranysy joǵary. Buryn-sońdy bolmaǵan taýarlyq nesıeniń maqsaty – mal basyn ósirý jáne ulǵaıtý. Osy arqyly aýyl turǵyndarynyń kásipkerlik ynta-jigerin, tabys tabýǵa degen qyzyǵýshylyǵyn arttyrý.
Aýyl azamattary úshin jobanyń shartyna qysqasha toqtalsaq:
- iri qara maldyń analyǵy bes bastan;
- qoı analyǵy on bastan;
- bıeler bes bastan bastap beriledi.
Osy nesıe túrine qol jetkizý úshin ne isteý kerek?
Birinshiden, taýarly nesıe alǵysy kelgen azamat jergilikti atqarýshy organǵa qandaı maldyń túri, qansha bas kerektigin aıtyp, ótinim beredi.
Ekinshi qadam, jergilikti atqarýshy organ qaryz alýshydan tıisti qujattardy alǵannan keıin taýarlyq nesıe berýshi operatordy anyqtaıdy.
Úshinshiden, taýarly nesıeni maquldanǵannan keıin qaryz alýshy men qaryz berýshi arasynda taýarlyq nesıe berý týraly ekijaqty shart jasalady.
Taýarly nesıemen berilgen maldy maqsatty paıdalaný
Alynǵan mal 7 jyldan aspaıtyn merzimge beriledi. Tólderdiń belgili bir mólsheri qaryz berýshige qaıtarylady. Beriletin tól 50% aspaıtyndaı bolýy shart. Taǵy bir tıimdiligi, nesıe berilgen soń 1 jylǵa deıin kanıkýl alýǵa bolady. Bul — bıznesti damytyp alýǵa jaqsy múmkindik.
«Aýyl amanaty» jobasyn iske asyrý tájirıbesi barlyq óńirge keńinen taralýy tıis. Bıyl oǵan 100 mlrd teńge bólindi, sonyń esebinen aýylda kóptegen kásipkerlik bastamany qoldaý josparlanyp otyr. Kelesi jyly taǵy 100 mlrd teńge bólemiz. Jobanyń arqasynda aýyldyq eldi mekenderde ómir súrý deńgeıi aıtarlyqtaı jaqsarmaq. Aqtóbe oblysy – jobany iske asyrý boıynsha jetekshi óńirlerdiń biri. Osy qarqynmen bul jumysty jalǵastyrý qajet», - dedi keshe Aqtóbe óńirine saparlaǵan Úkimet basshysy Álıhan Smaıylov.
Joba týraly ózge málimetter
Barlyq protsess memlekettik jaýapty mekemelerdiń qatysýymen júrgiziledi. Mysaly, aýdandardyń, aýyldyq okrýgterdiń ákimderi, aýyl sharýashylyǵy salasyndaǵy ýákiletti organ jáne qaryz berýshi taýarlyq nesıeniń nysanaly paıdalanylýyn baqylaý jáne ony qaıtarýǵa kepildik berý úshin jyl saıyn komıssııa quramymen jylyna keminde 2 ret qaryz alýshyǵa barady. Taýarly nesıeniń nysanaly (nysanaly emes) paıdalanylýyn rastaıdy. Eger taýarlyq nesıe maqsatsyz paıdalanylsa, qaryz alýshy alǵan malyn qaryz berýshige tolyq qaıtarýy tıis. Taýarly nesıeni qaıtarýdy baqylaý mindeti aýdandardyń, aýyldyq okrýgterdiń ákimderine, aýyl sharýashylyǵy salasyndaǵy ýákiletti organdaryna júkteledi.
Oblys ákimi Eraly Toǵjanov «Aýyl amanatyn» iske asyrý aýyldardy saqtap qalýǵa jáne halyqtyń qalaǵa kóshi-qonyn azaıtýǵa, kásipkerlikti damytý arqyly jańa jumys oryndaryn qurýǵa, jumyssyzdyqty azaıtýǵa, halyqty sapaly azyq-túlik taýarlarymen qamtamasyz etýge múmkindik beretin aýqymdy joba ekenin atap ótti.