Aýyl ákimine kandıdattary usyný qalaı júrgiziledi

NUR-SULTAN. QazAqparat – QR Ortalyq saılaý komıssııasynyń múshesi Erlan Daýylbaev aýyl ákimderin saılaý úshin qandaı jaıttar negiz bolatyndyǵyn atady, dep habarlaıdy QazAqparat tilshisi.

«Kandıdattardy usyný saılaý taǵaıyndalǵan kúnnen keıingi kúni bastalady jáne saılaý ótkiziletin ýaqytqa 15 kún qalǵanda jergilikti ýaqytpen saǵat 18.00-de aıaqtalady. Eger usyný merzimi aıaqtalatyn kúnge deıin aýyldyq mańyzy bar qala, aýyl, kent, aýyl okrýgine ekeýden kem kandıdat usynylsa, onda aýdandyq saılaý komıssııasy kandıttardy usynýdy 5 kúnnen aspaıtyn merzimge uzartady», - dedi ol OSK otyrysynda.

Sonymen qatar OSK múshesi kandıdattardy usyný tásilderine de toqtalyp ótti.

«Birinshi, saıası partııalar óz músheleriniń arasynan usynady. Bul rette saıası partııa bir saılaý okrýginde 1 ǵana kandıdat usynýǵa quqyly. Ekinshi, daýys berýge quqy bar tıisti okrýg saılaýshylarynyń jalpy sanynyń keminde 1 paıyzynyń qolyn jınaýdy qamtamasyz ete otyryp, ózin ózi usyný arqyly júzege asyrady. Úshinshi, eger usyný aıaqtalatyn kúnge ekeýden kem kandıdat usynylsa, aýdan ákimi usynady. Bul rette usynylǵan kandıdattar bolmaǵan ne usyný merzimi aıaqtalatyn kúni 1 kandıdat usynylǵan jaǵdaıda aýdan ákimi jergilikti qoǵamdastyq jınalysynyń kelisimi boıynsha tıisinshe 2 ne 1 kandıdatty usynýǵa quqyly», - dedi Erlan Daýylbaev.