Aýyl ákimin saılaý saıası reformalarǵa tyń serpin beredi - aqsaqaldar

TÚRKІSTAN. QazAqparat - Túrkistan oblysynyń aqsaqaldary elimizde tuńǵysh ret ótkiziletin aýyl ákimderiniń saılaýy saıası reformalarǵa tyń serpin beretinine senimdi. Al, eń bastysy turǵyndardy el basqarý men sheshim qabyldaý úderisine tartýǵa jol ashady, dep habarlaıdy QazAqparat.

Óńirde saılaý naýqanyna daıyndyq qyzý. Túrkistan oblysy jasyl aımaqta. Degenmen karantın talaptary qatań saqtalýy tıis.

Aldaǵy saılaýda epıdemıologııalyq jaǵdaı da basty nazarda bolmaq.

Túrkistan oblysynyń ákimi Ómirzaq Shókeev ońtústik aýdandarǵa jasaǵan jumys saparynda Maqtaaral, Shardara jáne Jetisaı aýdandarynyń aqsaqaldarymen kezdesip, birqatar qordalanǵan máselelerdiń sheshý joldaryn qarastyrdy.

Oblys ákimi saılaý naýqanyna daıyndyq barysyn pysyqtady.

Jetisaı aýdanynyń aqsaqaldary sýarmaly jerlerdi sorlanýdan saqtap, qunarlyǵyn arttyrý, isten shyqqan sý uńǵymalaryn jóndeýden ótkizip, sharýalardyń aǵys sý tapshylyǵyn sheshý, dıqandardy jala jumystaryna qajetti otynmen tolyq qamtý, aýylsharýashylyǵy salasyna memleketten sýbsıdııa bólý sekildi máselelerdi ortaǵa saldy.

Kóterilgen máselelerge qatysty oblys ákimi jaýapty sala basshylaryna tapsyrmalar berdi.

Shardara aýdanynyń qarııalary men zııaly qaýym ókilderi Qazaqstanda tuńǵysh ret ótetin aýyl ákimderiniń alamanyna halyq senimin aqtaıtyn, belsendiligi, iskerligi, joǵary jaýap­kershiligi bar azamattardyń qosylǵanyn qalaıdy.

«Eń aldymen, qarııalarǵa degen úlken qoshametińiz úshin halyqtyń atynan rızashylyǵymdy bildirgim keledi. Ótken joly kelgenińizde, jańarǵan Túrkistan qalasyn tamashalaýǵa degen nıetimizdi birden qoldadyńyz. Túrkistanda boldyq. Qasıetti mekenimizdiń gúldenýi barlyǵymyz úshin maqtanysh. Al, buqaranyń bılikke degen senimin arttyratyn aldaǵy aýyl ákimderiniń saılaýyn búkil el bolyp qoldap jatyr. Aýyl halqynyń óz ákimin ózi saılaýy bolashaq ákim úshin de, halyq úshin de jańa beles. Úlken jaýapkershilik»,-dedi Shardara aýdany ardagerler keńesiniń múshesi Oralbaı Aqberdıev.

Kópshilik arasynda saılaý kezinde rýǵa bura tartý bolýy múmkin ekeni týraly pikir bar. Ony aýdandaǵy ardagerler joqqa shyǵarmaıdy.

Kópti kórgen qarııalar kil myqtyda kimniń myqty ekeni tikeleı daýys berý arqyly anyqtalatyn saıası báıgeniń ýaqyt óte kele deńgeıi bıikteı túsetinin aıtty.

Sapar barysynda oblys ákimi birqatar áleýmettik nysandardy aralap, sharýa qojalyqtarynyń jumysymen tanysty.