Aýyl ákimin saılaý: Ózin ózi usynǵan kandıdat turǵyndardyń kem degende 1 paıyz qolyn jınaý qajet
«Senat aýyl ákimderin saılaý týraly zań qabyldady. Budan bylaı aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń ákimderi tikeleı saılaýda saılanatyn bolady. Saılaýǵa jasy 25-ke tolǵan azamattar qatysa alady. Kandıdattardy saıası partııalar men aýdan ákimderi usynady. Sondaı-aq, azamattar ózin ózi usynyp, saılaýǵa kandıdat retinde qatysýǵa múmkindigi bar. Ol úshin sol aýyl turǵyndarynyń kem degende 1 paıyzynyń qolyn jınaý qajet.
Byltyr Ulttyq keńes -tiń saıası reformalar jónindegi toby osy taqyrypqa qatysty birneshe usynys aıtty. Sonyń biri – aýyl ákimderin tikeleı jasyryn daýys berý arqyly saılaý jáne kez kelgen azamattyń saılaný quqyǵyn shektemeý. Sol joly aýyl ákimine úmitkerlerge qoıylatyn talap ta jeńildeý bolsyn degen tilegimizdi aıtqan edik», - dep jazdy Maksım Spotkaı jelidegi paraqshasynda.
Onyń habarlaýynsha Senatta qabyldanǵan zańnyń mańyzy óte zor.
«Prezıdentimiz aıtqandaı, aýyl ákimderin saılaýdy júzege asyramyz dep asyǵystyq, naýqanshyldyq tanytpaý kerek. Qazaqstannyń saıası tranformatsııasy bir sáttik, popýlıstik aktsııa emes. Bul reforma maǵynasy jaǵynan strategııalyq sıpatqa ıe.
Sonymen qatar búgin senatorlar Memleket basshysynyń bastamasymen qolǵa alynǵan saıası reformalardy iske asyrý aıasynda saılaý týraly zańnamalarǵa birqatar túzetýler engizdi. Onyń ishinde - saıası partııalardyń Májilis pen máslıhattarǵa ótý shegin 7-den 5 paıyzǵa deıin tómendetý jáne daýys berý bıýlletenderine «Bárine qarsymyn» degen baǵan engizý.
Bul zańdar Prezıdentimiz bastaǵan saıası reformalardy iske asyrý jolyndaǵy kelesi nyq qadam dep aıtýǵa bolady. Al bul reformalardyń túpki maqsaty – eldi demokratızatsııalaý protsesin jalǵastyrý jáne barlyq qazaqstandyqtardyń ál-aýqatyn arttyrý dep qabyldaǵan jón», - dep tolyqtyrdy ol.
Aıta ketsek, buǵan deıin Senat ákimderdi tikeleı halyqtyń saılaýyna múmkindik beretin zańdy qabyldaǵany týraly jazdyq.