Aýyl ákimin óltirgen aqtóbelikke sot úkimi shyqty

AQTÓBE. QazAqparat – Aqtóbe oblysy Alǵa aýdandyq sotynda Qarabulaq aýylynyń ákimi Ernar Mahambetovtiń ólimine qatysty is qaralyp, úkim shyqty. Sottalýshy Qurman Ótegenov 8 jylǵa bas bostandyǵynan aıyryldy, dep habarlaıdy QazAqparat tilshisi.

Alǵa aýdandyq sotynda Qarabulaq aýylynyń ákimi Ernar Mahambetovti óltirdi degen aıyppen Qurman Ótegenovke qatysty is qaraldy. Іs materıalyna súıensek, jábirlenýshi men sottalýshy sharýa qojalyǵyna baryp, sol jerde ishimdik ishken. Keıin arada janjal shyǵyp, biri ekinshisine pyshaq suǵyp alǵan.

Sot-medıtsınalyq saraptama qorytyndysyna súıensek, jábirlenýshi Ernar Mahambetov kesip-tesetin zattan jaralanyp, kóp qan joǵaltqany belgili boldy. Aýrýhanaǵa jetkizgen kezde onyń ólimi tirkeldi.

«Sottalýshy Qurman Ótegenov Qylmystyq kodekstiń «Densaýlyqqa qasaqana aýyr zııan keltirý» baby boıynsha aıypty dep tanylyp, 8 jylǵa bas bostandyǵynan aıyrý jazasyn taǵaıyndalsyn. Jazasyn óteý orny qylmystyq atqarý júıesiniń qaýipsizdigi ortasha mekemesi bolyp belgilensin», - dedi Alǵa aýdandyq sotynyń sýdıasy Kamshat Kılbaeva.

Eske salsaq, oqıǵa byltyr jeltoqsan aıynda boldy. Alǵashynda QR QK 99-babynyń 1-bóligi boıynsha qylmystyq is qozǵaldy. Jedel-tergeý toby sharýa qojalyǵynyń basshysy men 36 jastaǵy er adam arasynda janjal bolǵanyn anyqtaǵan.