Aýyl ákimi men onyń apparatyna qosymsha fýnktsııalar berilmek

ASTANA. QazAqparat – Bıýdjettiń IV deńgeıine qosymsha salyqtar men tólemderdiń keıbir túrlerin berý josparlanyp otyr. Bul týraly Májiliste «Qazaqstan Respýblıkasyndaǵy jergilikti ózin-ózi basqarý týraly» zań jobasyn tanystyrý kezinde Ulttyq ekonomıka vıtse-mınıstri Baýyrjan Omarbekov aıtty, dep habarlaıdy QazAqparat tilshisi.

«Jalpy, qoldanystaǵy zańnamaǵa sáıkes, ákimniń jáne onyń apparatynyń burynnan bar fýnktsııalaryn eskere otyryp, zań jobasy aıasynda aýyl ákimi men onyń apparatyna tıisti qosymsha fýnktsııalar berý usynylyp otyr. Bul turǵyda kórme-jármeńke qyzmetin uıymdastyrý jáne kóshe saýdasynyń monıtorıngi (aýdandyq deńgeıden), kommýnaldyq qaldyqtardy bólek jınaýdy uıymdastyrý, balalar oıyn alańdaryna arnalǵan jabdyqtardyń qaýipsiz bolýyna monıtorıng júrgizý, sondaı-aq jaıylymdardy basqarý jáne olardy paıdalaný jónindegi jospardyń iske asyrylýyn qamtamasyz etý (aýdandyq deńgeıden), turǵyndarǵa aqyly negizde qyzmet kórsetý sııaqty fýnktsııalar eskerilgen», - dedi B. Omarbekov.

Onyń aıtýynsha, zań jobasy aıasynda bıýdjettiń IV deńgeıine qosymsha salyqtar men tólemderdiń keıbir túrlerin berý josparlanyp otyr:

- oblys máslıhaty bóletin zańdy tulǵalar men jeke kásipkerlerdiń múlik salyǵynyń 50%-y;

- jekelegen qyzmet túrlerimen aınalysý quqyǵy úshin lıtsenzııalyq alym (benzındi, dızel otynyn, ekologııalyq otyndy kóterme jáne bólshek saýdada ótkizý jáne basqa da ónimder);

- jekelegen qyzmet túrlerimen aınalysýǵa lıtsenzııalardy paıdalanǵany úshin tólemaqy;

- sý resýrstaryn paıdalanǵany úshin tólem.

«Sonymen qatar, ákim apparattaryna aqyly qyzmetterdi iske asyra otyryp, aýyl bıýdjetin kóbeıtýge múmkindik beriledi. Ol úshin ákim Keńespen (aýyldyq okrýg keńesi) kelisim boıynsha kommýnaldyq kásiporyn qurý nemese eńbekaqy tóleýdiń kesimdi júıesimen qyzmetti júzege asyratyn tıisti mamandardy tikeleı jaldaý arqyly qosymsha jumysshylardy tarta alady. Máselen, ákimge Keńespen kelisim boıynsha qajetti arnaýly tehnıkany óz balansyna satyp alýǵa nemese tıisti tehnıkasy bar jergilikti turǵynmen (kásipkermen) shart jasasýǵa múmkindik beriledi. Bul rette, Keńes bekitken tarıf boıynsha osy qyzmet ákim apparaty atynan aýyldyń basqa turǵyndaryna nemese uıymdaryna da kórsetilýi múmkin», - dedi vıtse-mınıstr.

Onyń paıymynsha, bul qadamdar jedel túrde kadr tapshylyǵyn sheshýge jáne ákim apparatynyń ókilettigi sheginde jekelegen qyzmetterdi oryndaý úshin aýyl turǵyndaryn jumysqa ornalastyrýǵa múmkindik beredi.

Budan buryn habarlanǵandaı, búgin Májiliste tanystyrylǵan zań jobasy aıasynda Qazaqstanda aýyldyq okrýg keńesterin qurý josparlanyp otyr.