Aýyl ákimdikteriniń qyzmetshileri de «Dıplommen aýylǵa» baǵdarlamasyn qoldanýda

AQTÓBE. QazAqparat - Aqtóbede memlekettik qyzmetshiler «Dıplommen aýylǵa» baǵdarlamasyn paıdalanyp jatyr, dep habarlaıdy QR Memlekettik qyzmet isteri agenttiginiń óńirlik departamentiniń baspasóz qyzmeti.

Esterińizge salsaq, bıyl QR Memlekettik qyzmet isteri agenttiginiń bastamasymen QR Prezıdenti memlekettik qyzmetshilerdiń «Dıplommen aýylǵa» jobasyna qatysýǵa múmkindik beretin zańnamaǵa ózgerister engizdi.

Bul degenimiz aýyldyq jerlerde densaýlyq saqtaý, mádenıet, sport, orman sharýashylyǵy salasynda qyzmet etýge nıettengen azamattar qataryna memlekettik qyzmetshilerdiń de engendigin bildiredi.

Aqtóbelik memlekettik qyzmetshilerdiń arasynda alǵashqy bolyp, atalǵan jobany qoldanýǵa sheshim qabyldaǵandardyń biri – jas maman Azamat Ákimbaı.

Áıteke bı aýdanynyń Komsomol aýyldyq okrýgi ákimi apparatynda bas maman laýazymynda qyzmet atqaryp jatqan Azamat Ákimbaıdyń aıtýynsha, bul joba jas mamandardyń kásibı ósýine úlken múmkindik beredi.

Jaqynda otbasyly bolǵan jas maman aýylǵa kelip, baǵdarlama aıasynda kóterme járdemaqy jáne bıýdjettik nesıe alý arqyly turǵyn úıge qol jetkizgen.