Aýyl ákimderin saılaý: Jambyl oblysynda 97 ýchaske jumys isteıdi
Kezdesýge «Nur Otan», «Aýyl» HDPP, «Aq jol» DP, «Qazaqstannyń Halyq partııasy», «ADAL» partııasy fılıaldarynyń ókilderi qatysty.
Jıynda oblystyq aýmaqtyq saılaý komıssııasynyń basshysy Serǵalı Aıdapkelov baıandama jasady.
Onyń aıtýynsha, aýyldyq okrýg ákimderin saılaý shilde, qyrkúıek, qazan, jeltoqsan aılarynda ótedi. Turǵyndar 97 saılaý ýchaskesi arqyly daýys bere alady.
«Qazaqstan Prezıdenti Qasym-Jomart Toqaev 2021 jyldyń mamyr aıynda aýdandyq mańyzy bar qalalardyń, aýyldardyń, kentter men aýyldyq okrýgterdiń ákimderin tikeleı saılaýdy qarastyratyn túzetýlerge qol qoıǵan bolatyn. Ákimniń zańmen belgilengen ókilettik merziminiń aıaqtalýy saılaýdy taǵaıyndaýǵa negiz bolyp tabylady. Kandıdat 25 jastan asqan, sottalmaǵan, Qazaqstan Respýblıkasynyń azamaty, joǵary bilimdi bolýy shart», - dedi S.Aıdapkelov.
Jaqynda tirkelgen saıası partııalardyń kandıdattardy usyný úrdisi bastalady. Saılaýǵa ózin-ózi usynǵan kandıdattar da qatysa alady. Ol úshin sol aýyl turǵyndarynyń ıaǵnı saılaýshylardyń kem degende 1 paıyzynyń qolyn jınaý qajet.
«Usynylǵan kandıdattardyń sany ekiden az bolsa, aýdan ákimderi balama úshin óz kandıdattaryn usynýǵa quqyly. Aýdan ákimderi úmitkerlerdi jergilikti turǵyndarmen kelise otyryp tańdaıdy», - dedi S.Aıdapkelov.
Oblys ákimi bul saılaýdyń mańyzdylyǵyn, oǵan sapaly daıyndalý kerektigin atap ótti. Saılaý komıssııalarynyń, jergilikti atqarýshy organdardyń ózara tıimdi áreketine negizdelgen sharalar qabyldaýdy, saılaýdyń barlyq qatysýshylarynyń zańnamany qatań saqtaýyn qamtamasyz etýdi tapsyrdy.
«Aldaǵy saılaý halyqtyń bılikke degen senimin jáne ákimniń aýyl turǵyndary aldyndaǵy jaýapkershiligin kúsheıtedi. Sonymen qatar, aýyl ákiminiń olardyń máseleleri boıynsha shuǵyl áreket etý qabiletin arttyrady», - dedi oblys ákimi.
Sondaı-aq, keńes barysynda pandemııa jaǵdaıynda saılaýǵa qatysýshylardyń densaýlyǵyn qorǵaý sharalary da nazarǵa alyndy.