Aýtızmge shaldyqqan balany qoǵamǵa beıimdeý: ata-analar tájirıbe almasty

ASTANA. QazAqparat – Búgin Astanada aýtızmmen aýyratyn balalardyń ata-analaryna arnalǵan «Autism Talks» sharasy ótti. Oǵan osy dertke shaldyqqan jáne damýynan basqa da erekshelikter anyqtalǵan búldirshinderdiń 200-den astam ata-anasy qatysty, dep habarlaıdy QazAqparat tilshisi.

«Bolashaq» qorynyń uıymdastyrýymen ótken «Autism Talks» alańynda ata-analar aýtızm dıagnozy qoıylǵan balalaryn qoǵamǵa beıimdeý, oqytý jáne shyǵarmashylyq talantyn damytý baǵytyndaǵy tájirıbelerimen bólisti.

Qor tóraǵasy Dınara Ǵaplannyń aıtýynsha, «Ár bala mektepke barýǵa laıyqty» jobasy sheńberinde aýtızmmen aýyratyn 700-den astam balaǵa qoldaý kórsetilgen.

«Joba aıasynda qor búkil Qazaqstan boıynsha 70 mamandandyrylǵan ońaltý mekemesi men kabınetin ashty jáne jabdyqtady. Onyń ishinde Qazaqstannyń 22 qalasynda 46 ınklıýzııany qoldaý kabınetin ashtyq. Joba erekshe bilim berýdi qajet etetin 2000-nan astam balany qamtydy. Aýtızm jáne damýynda basqa da erekshelikteri bar 700-den astam bala mektep tabaldyryǵyn attap, qurdastarymen bir partaǵa otyrdy. Ol balalardy buryn mektepterge jáne arnaıy synyptarǵa da almaǵan. Endi olar qor jumysynyń nátıjesinde barlyǵymen teń dárejede mektepke baryp, bilim alyp júr. Bizdiń qordyń bastamasymen erekshe qajettilikteri bar balalarǵa arnalǵan arnaıy oqý baǵdarlamalary da ázirlendi, ıaǵnı ár búldirshinniń ereksheligine qaraı bilim beriledi», - dedi «Bolashaq» qory qamqorshylyq keńesiniń tóraǵasy Dınara Ǵaplan.

Balasyna atalǵan dıagnoz qoıylǵandardyń biri – Qazybaevtar otbasy. Januıa sábıin qoǵamǵa beıimdeý úshin arnaıy baǵdarlama ázirlegen. Onyń nátıjesin kórgen aqtóbelik erli-zaıyptylar ózgelerge de kómektesý maqsatynda ortalyq ashypty.

«Bizdiń ortalyqta 15 maman jumys isteıdi. Búginge deıin 2 myńnan astam balaǵa dıagnostıka jasadyq. Ortalyqta 35 bala ońaltýdan ótip jatyr. Qazir aýtızmmen aýyratyn balalarǵa qoǵam yńǵaıly bolyp keledi. Osydan 15 jyl buryn, meniń balama osy dıagnoz qoıylǵanda qoǵam múldem daıyn emes edi. Barlyǵy meniń balamnyń mektepte oqyǵanyna qarsy boldy. «Dalaǵa shyǵarma, mektepke berme, úıde otyrsyn» dep, shektep ustatýǵa tyrysty. Biraq, biz jubaıym ekeýmiz balamen basqasha jumys isteımiz dep sheshtik. Osy óz jolymyzben júrip, jetistikke jete bildik. Oǵan qýanyshtymyz. Osydan keıin kópshilik bizden kómek surap keldi. Suranys kóp bolǵannan keıin, biz ortalyq ashtyq», - dep atap ótti Sara Qazybaeva.

Sharaǵa ata-analarmen qatar, aýtızm dertimen aýyratyn balalarmen jumys isteıtin mamandar da qatysty. Olar kelýshilerge kásibı keńes berdi.