Aýtızm kúni: Almatyda qaıyrymdylyq shara ótti

ALMATY. QazAqparat - Almatyda Dúnıejúzilik aýtızm problemasy týraly aqparat taratý kúnine oraı qaıyrymdylyq kontsert ótti, dep habarlaıdy QazAqparat tilshisi.

Aýqymdy shara Balýan Sholaq atyndaǵy sport saraıynda ótip jatyr. Bul jerge aýtızmge shaldyqqan 300 jýyq adam men olardyń týystary jınaldy Sondaı-aq jıynǵa aqyl esiniń damýynda mesheýlik bar, Daýn sındromy, sal aýrýymen aýyratyndar da jınaldy.

«Bul kúni álemde 2008 jyldan beri atalyp ótiledi. 2009 jyldan bastap ózim osy salada jumys istep kelemin. Meniń basty maqsatym - adamdardyń osy problemaǵa nazaryn aýdartý», - dedi sharany uıymdastyrýshylardyń biri Janat Qarataı.

Onyń aıtýynsha, Qazaqstanda osyndaı naýqastar sany jyl saıyn artyp keledi. Qazirdiń ózinde resmı derekterge júginsek, Qazaqstanda 2000-ge tarta adam aýtızmge shaldyqqan.

«Qazir osyndaı naýqastardy qaıta ońaltýǵa, túrli sharalar uıymdastyrýǵa eshqandaı baǵdarlama joq desek te bolady», - dedi Janat.

Shara barysynda naýqas balalardyń ata-analary balalaryna qýanysh syılaý úshin kontsert qoıyp, fleshmob, «Altyn balalarǵa - altyn shar» aktsııasyn uıymdastyrdy.

Shyǵarmashylyq uıymdarynyń ókilderi balalarǵa arnap arnaıy sheberlik saǵattaryn ótkizdi. Sabyn kópirshikteri shoýy kórsetildi. Balalarǵa úıretilgen ıttermen sýretke túsýge múmkindik berildi.

Resmı shara barysynda Nur Otan partııasy Almaty bólimshesi tóraǵasynyń orynbasary Stanıslav Konkýrov qazir bul problemaǵa memleket basa nazar aýdaryp otyrǵanyn aıtty.

«2013 jyldan bastap Nur Otan partııasy «Kedergisiz otbasy» sharasyn ótkizip keledi. Shara aıasynda adamdardy jumysqa turǵyzý, kedergisiz orta qalyptastyrý máseleleri qamtylǵan», - dedi Stanıslav.

Onyń aıtýynsha, 2015 jyldan bastap Almaty ákimdigi múmkindigi shekteýli balalardy qorǵaýǵa bólinetin qarjy kólemin eki esege deıin ósirgen.