Aýsyl indetine baılanysty Almaty, Jambyl, Ońtústik Qazaqstan jáne Qyzylorda oblystary býferlik aımaqqa jatqyzyldy - AShM
Bul týraly búgin Aýyl sharýashylyǵy mınıstrliginde ótken brıfıng barysynda málim boldy.
Budan bólek, Aýyl sharýashylyǵy mınıstrligi Veterınarııalyq baqylaý jáne qadaǵalaý komıteti respýblıkanyń barlyq aýmaǵynda jasyryn vırýstasymaldaýshyny múmkindiginshe azaıtý maqsatynda, aýsyl vırýsynyń qurylymsyz belogynyń barlyǵyn anyqtaý boıynsha seromonıtorıngtik zertteýler júrgizýdi qolǵa alǵan. Sonymen qosa, janýarlar qozǵalysynyń baqylaýyn qamtamasyz etý jáne býferlik aımaqtan aýrý janýarlardyń kontrabandalyq qozǵalysyn joıý maqsatynda birdeılendirý jáne málimetter bazasyn qurý jolymen janýarlardy esepke alý júıesi jandana túsetin bolady. Aýrý janýarlardy der kezinde anyqtaý jáne qolaıly óńirlerge kontrabandalyq tasymaldaýǵa jol bermeý úshin janýarlardy satatyn oryndarǵa baqylaý kúsheıtilýde. Budan bólek, maldyń aýrýdy qaıta juqtyrý qaýpi týraly halyqty der kezinde habarlaý úshin qolaısyz pýnktterdi anyqtaý kezinde veterınarııalyq qyzmet jumysynyń aıqyndyǵy men ashyqtyq deńgeıin joǵarylatýǵa barynsha mán beriledi.
«QR AShM mal satyp alýshylardan tiri maldy satyp alar kezde barlyq janýarlardyń veterınarlyq qujattarynyń, al iri qara úshin qosymsha biregeılendirilgen qulaq syrǵalarynyń bolýyna nazar aýdarýdy suraıdy. Aımaqtarda indettiń taralýynyń basqa da mańyzdy faktorlarynyń biri mal ıeleriniń, jergilikti atqarýshy organdardyń jáne veterınarlardyń klınıkalyq aýrý maldardy jasyrýy bolyp tabylady. Buǵan esh jol berilmeýi shart. Bul rette mınıstrlik tárkilep, joıǵan aýrý janýarlarǵa naryqtyq qunymen 100 paıyzdyq ótemaqy tólenetini jónindegi resmı málimdeme jasalǵan bolatyn. Qazir habarlaý jıilep keledi, áli de belsendilik bola tússe quba-qup. Buqaralyq aqparat quraldarynan da kómek qajet», - deıdi Veterınarııalyq baqylaý jáne qadaǵalaý komıteti tóraǵasynyń orynbasary Mereke Taıtýbaev.