Aýstrııada qaıta qatań karantın engizilmek

VENA. QazAqparat – Aýstrııada koronavırýs juqtyrǵandar sanynyń artýyna baılanysty 17 qarasha men 6 jeltoqsan aralyǵynda karantın erejesi engiziledi. Bul týraly QazAqparat dw.com-ǵa silteme jasap habarlaıdy.

Aýstrııa úkimeti koronavırýsqa shaldyqqandar sany artqandyqtan, pandemııa bastalǵaly ekinshi ret erekshe qatań karantın tártibin (lokdaýn) engizip jatyr. Bul týraly senbi, 14 qarashada Venadaǵy baspasóz konferentsııasynda kantsler Sebastıan Kýrts habarlady.

17 qarasha, seısenbiden bastap 6 jeltoqsanǵa deıin elde mektepter, turmystyq qyzmet kórsetý mekemeleri jabyq bolady. Tek asa qajettilik bolǵan jaǵdaıda úıden shyǵýǵa ruqsat etiledi. Oǵan jumysqa barý, týystaryna kómek kórsetý nemese taza aýada demalý jatady. Degenmen, erejelerdi parlament ár on kún saıyn qaıta qarap otyrady.

Dárihana, bank, adamdarǵa kúndelikti qajet taýarlardy satatyn dúkender, sýpermarketter jumysyn jalǵastyrady. Balabaqshalar jabylyp, mektepter qashyqtan oqýǵa kóshedi. Keı jaǵdaılarda ǵana ata-analar balasyn bul mekemelerge ákele alady.

«Eshkim qaıta lokdaýndy engizýdi qalamaıtynyn bilemiz, biraq bul pandemııamen kúreste tıimdiligi joǵary jalǵyz tásil», - dep atap ótti Kýrts.

Aýstrııadaǵy meıramhanalar, týrıstik bıznespen aınalysatyn kompanııalar, sondaı-aq mádenı jáne saýyqtyq mekemeler 3 qarashadan bastap jabylǵan bolatyn. Oǵan qosa elde 20.00-6.00 aralaǵynda kommendanttyq saǵat engizildi.

Djon Hopkıns ýnıversıtetiniń málimetinshe, pandemııa bastalǵaly Aýstrııada 191 228 adam koronavırýs juqtyrdy. 1661 naýqas kóz jumdy. Qarashadan bastap elde jańa juqtyrý oqıǵalary kóbeıip, sarapshylar densaýlyq saqtaý júıesi, onyń ishinde qarqyndy terapııa salasyna aýyrlyq túsetininen qaýiptene bastady.

Aýstrııada alǵashqy lokdaýn naýryzdyń ortasynda engizilip, 2020 jyldyń 12 sáýirinen bastap jeńildetile bastaǵan bolatyn.