Aýstrııa polıtsııasy jalǵan koronavırýs sertıfıkattary týraly isti tergeýde

NUR-SULTAN. QazAqparat – Aýstrııanyń quqyq qorǵaý organdarynyń boljaýynsha, ondaǵan adam Venadaǵy iri vaktsınalaý ortalyqtarynyń birinen jalǵan qujattar alǵan, dep habarlaıdy QazAqparat euronews.com agenttigine silteme jasap.

Ázirge alaıaqtardyń mundaı qyzmet úshin qandaı soma suraǵany belgisiz.

«Jeltoqsannyń basynda bizdiń ortalyqta ekpelermen manıpýlıatsııa jasalǵanyn bildik. Bizge bul týraly áriptesterimiz aıtty. Elektrondyq tizilimdegi derekter tekserilgennen keıin barlyǵy anyqtaldy», - dedi Samariterbund vaktsınalaý ortalyǵynyń qyzmetkeri Stefanı Kýrtsveıl.
Stefanıdiń aıtýynsha, 30-100 adam jalǵan sertıfıkattar alǵan bolýy múmkin. Qazirgi kezde bul alaıaqtyqqa qatysy bar ortalyqtyń eki qyzmetkeri jumystan shyǵarylǵan.
«11 jeltoqsan kúni 26 jastaǵy Aýstrııa azamatshasy telefon arqyly keıin vaktsına alǵandar tizimine engizilgen adamdardyń tegin jazyp alǵan. Bul adamdar koronavırýsqa qarsy ekpe saldyrmaǵan dep kúmándanyp otyrmyz», - dedi Vena polıtsııasynyń ókili Barbara Gas.
Kinási dáleldengen jaǵdaıda, áıel bir jylǵa bas bostandyǵynan aıyrylýy múmkin.
Sońǵy eki apta men aılarda Aýstrııa halyqty vaktsınalaý boıynsha kórsetkishterin jaqsartty. Elde halyqtyń 70%-y vaktsına saldyrǵan. Alaıda endi bul statıstıkaǵa senimsizdik týyp otyr.