Aýstralııada fermer ózine shabýyldaǵan qoltyraýyndy tistep alǵanynyń arqasynda aman qaldy

<p>Aýstralııalyq fermer Kolın Devero uzyndyǵy 3,2 metrlik qoltyraýynnyń shabýylynan keıin aýrýhanada bir aı jatty, dep habarlaıdy <a href="https://kaz.inform.kz/" target="_blank" rel="noopener">Kazinform</a> <a href="https://www.bbc.com/news/world-australia-67354430" target="_blank" rel="noopener">BBC</a>-ge silteme jasap.</p>

Oqıǵa Soltústik aımaqta bolǵan.

Ferma ıesi AVS-ge bergen suhbatynda ólimshi shaıqasta aman qalýǵa tyrysyp, qoltyraýynnyń qabaǵynan ózi tistep alǵanyn aıtty.

Deveronyń aıtýynsha, basynan ótken oqıǵa ótken aıda Fınnıs ózeni boıyna qorshaý salýǵa barǵanynda bolǵan.

Ol ózen jaǵasyna kelip, sýdyń taıaz jerinen júzip bara jatqan balyqty baıqady. Ketip bara jatqanynda, oń aıaǵynan qoltyraýyn tistep, er adamdy sýǵa súıredi.

Fermer baýyrymen jorǵalaýshyny ekinshi aıaǵymen tebýge tyrysyp, sodan keıin ony ózi tistep jiberdi.

«Men sondaı yńǵaısyz kúıde boldym... biraq bir sátte tisim onyń qabaǵyna tıdi. Ol bylǵary sııaqty óte qalyń edi, biraq men onyń qabaǵyn tisimen tartyp qalǵanda, ol meni jiberdi. Men artqa sekirip, kóligim turǵan jerge tezirek jetýge tyrystym. Qoltyraýyn artymnan tórt metrdeı qýyp, keıin toqtap qaldy», - dedi er adam.

Ol aıaǵyndaǵy qandy toqtatý úshin súlgi men arqan qoldanýǵa májbúr boldy. Keıin aǵasy ony soltústikke, Koroldik Darvın aýrýhanasyna jetkizdi.

«Bul - istep jatqan isimdi ózgertý kerek degen belgi. Qorshaýlardy jóndeımin dep, bul batpaqty eldi uzaq ýaqyt aralap ómir súrdim. Osy oqıǵa kózimdi ashqandaı boldy», - dedi Devere.

Jergilikti úkimettiń málimetinshe, Soltústik aımaqtaǵy qoltyraýyndar zańmen qorǵalady. Olar osy jerge týrısterdi kóptep tartady.

Qoltyraýynnyń adamǵa jasaǵan sońǵy shabýyly osy jyldyń sáýir aıynda Keıp-Iork túbegindegi Kennedı ózeninde bolǵan.