Aýstralııa jeltoqsanda sheteldik jumysshylar men stýdentterge shekarasyn ashady

KANBERRA. QazAqparat – Aýstralııa belgili bir sheteldik top úshin elge kirý erejesin aıtarlyqtaı báseńdetetinin málim etti. Ol topqa bilikti jumysshylar, stýdentter, sondaı-aq Ońtústik Koreıa men Japonııa turǵyndary kiredi, dep habarlaıdy QazAqparat BBC News-ke silteme jasap.

Aýstralııa bul toptaǵy sheteldik azamattarǵa 1 jeltoqsannan bastap 2020 jyldyń kókteminen beri alǵash ret kirýge ruqsat beredi. Álemdegi eń qatal lokdaýndardyń birin engizgen el olarǵa negizgi eki talap qoıyp otyr. Olar tolyqtaı vaktsına alýy tıis, sondaı-aq PTR testi teris nátıje kórsetý kerek.

El úkimeti jeltoqsan-qańtar aralyǵynda 200 myńǵa jýyq azamat qabyldaýdy josparlap otyr. Іshki ister mınıstri Karen Endrıýs tolyq vaktsına alǵan bilikti mamandar, stýdentter, Japonııa jáne Ońtústik Koreıa azamattary, gýmanıtarlyq vızasy bar basqa da memleket turǵyndary elge kire alatynyn málim etti.

Aýstralııa vaktsınatsııalaý maqsatyna qol jetkizgennen keıin qalypty ómirge kezeń-kezeńimen oralyp jatyr – 16 jastan asqan aýstralııalyqtardyń 85%-dan astamy tolyq vaktsına alǵan.