Australian Open: Novak Djokovıch rekord ornata ala ma

<p>ASTANA. KAZINFORM &ndash; Aýstralııa ashyq chempıonatynda erler arasynda jartylaı fınalǵa shyqqan sportshylar túgeldeı belgili boldy.</p>

Osyǵan deıin Aýstralııa birinshiliginde on ret chempıon atanǵan álemniń 1-raketkasy, serbııalyq Novak Djokovıch bıyl da basty úmitkerdiń biri sanalady.

Serbııalyq tennısshi shırek fınalda tórt saǵatqa jýyq ýaqytqa sozylǵan tartysty matchta álemniń 12-raketkasy, amerıkalyq Teılor Frıtsti joldan taıdyrdy – 7:6 (7:3), 4:6, 6:3, 6:2.

N.Djokovıchtiń jartylaı fınaldaǵy qarsylasy ońaı emes, Italııanyń jas perisi, álemniń 4-raketkasy ıAnnık Sınner. Ol shırek fınalda reıtıngide ózinen bir saty tómen turǵan reseılik Andreı Rýblevtan aılasyn asyrdy – 6:4, 7:6 (7:5), 6:3.

Taǵy bir jartylaı fınalda reseılik, álemniń 3-raketkasy Danııl Medvedev pen reıtıngide 6-satydaǵy germanııalyq Aleksandr Zverevtiń joldary toqaılasady.

D.Medvedev 4 saǵatqa jýyq ýaqytqa sozylǵan básekede álemniń 9-raketkasy, Polsha ókili Hýbert Hýrkachtyń mysyn basty – 7:6 (7:4), 2:6, 6:3, 5:7, 6:4.

Al A.Zverev álemniń 2-raketkasy, 20 jastaǵy ıspanııalyq Karlos Alkarasty qapy qaldyrdy – 6:1, 6:3, 6:7 (2:7), 6:4.

Eger Novak Djokovıch chempıon atanatyn bolsa, onda ol ótken jylǵy ataǵy men reıtıngilik upaıyn qorǵap qana qoımaı, rekord ornatady. Ol jekeleı synda «Úlken dýlyǵa» týrnıriniń 25 dúrkin jeńimpazy atanyp, bul kórsetkish jóninen Margaret Kortty da artta qaldyrady.

Eske sala keteıik, budan buryn Aýstralııa ashyq chempıonatynda jasóspirimder arasynda qazaqstandyqtardan alǵash bolyp Ámir Omarhanovtyń shırek fınalǵa shyqqanyn jazǵan edik.

Sondaı-aq qazaqstandyq jas tennısshi Aýstralııadaǵy týrnırdi sátti bastady.

Aýstralııa chempıonatynda áıelder arasynda jartylaı fınalǵa shyqqan tennısshiler anyqtaldy.