Australian Open: Elena Rybakınanyń kelesi qarsylasy anyqtaldy

ASTANA. QazAqparat – Qazaqstannyń birinshi, álemniń 25 raketkasy Elena Rybakınanyń Aýstralııa ashyq chempıonaty shırek fınalyndaǵy qarsylasy anyqtaldy, dep habarlaıdy QazAqparat tilshisi.

Aýstralııa ashyq chempıonatynyń tórtinshi aınalymynda álemniń 7-raketkasy, amerıkalyq, 18 jastaǵy Korı Gaýff pen dúnıejúzilik reıtıngte 17-orynda turǵan latvııalyq Elena Ostapenko kezdesti.

Bul básekede K.Gaýff favorıt sanalǵanymen, E.Ostapenko 7:5, 6:3 esebimen jeńiske jetti. Sóıtip E.Rybakınanyń qarsylasy atandy.

E.Ostapenko – 2017 jyly 20 jasynda Rolan Garros týrnıriniń jeńimpazy atanǵan tanymal sportshy.

E.Rybakına men E.Ostapenkonyń básekesi 24 qańtar kúni tańǵa belgilengen.

Buǵan deıin qarsylastardyń eki márte joldary toqaılasyp, ekeýinde de latvııalyq tennısshi jeńgen edi. E.Rybakına sonyń esesin qaıtara ala ma, aldaǵy oıyn kórsetedi.

Eske sala keteıik, budan buryn Aýstralııa chempıonatynda Elena Rybakınanyń álemniń 1-raketkasyn utyp, shırek fınalǵa shyqqanyn jazǵan edik.