Australian Open: Rybakına «Úlken dýlyǵa» týrnırin jeńispen bastady

<p>MELЬBÝRN. KAZINFORM &ndash; Qazaqstannyń birinshi, álemniń 3-raketkasy Elena Rybakına Aýstralııa ashyq chempıonatynyń ekinshi aınalymyna shyqty.Qazaqstandyq tennısshige alǵashqy aınalymda-aq qıyn qarsylas tap keldi.</p>

Kezinde álemdik reıtıngide kósh bastaǵan, qazir reıtıngide 38-orynda turǵan chehııalyq, 31 jastaǵy tájirıbeli Karolına Plıshkova ońaı shaǵylar jańǵaq emes-ti.

Osyǵan deıin qarsylastar ózara úsh ret kezdesip, sonyń bárinde E.Rybakına utqan edi.

2020 jyly Dýbaıda 7:6 (7:1), 6:3, 2022 jyly Meksıkada Gvadalaharada 7:6 (7:5), 6:2 jáne ótken jyly taǵy da Dýbaıda 6:4, 6:2 esebimen basym túsken-di.

Biraq ekeýi «Úlken dýlyǵa» týrnırinde alǵash ret betpe-bet keldi, sonyń munyń bási bıik-ti.

Birinshi partııada Karolına breık jasap, 2:0 esebimen alǵa ketkenimen, Elena tarazy basyn teńestire aldy.

Taı-breıkte de chehııalyq sportshy 6:3 esebimen alǵa shyǵyp, tórt birdeı setbolyn paıdalana almady. E.Rybakına qatarynan bes dopty ózine jazdy — 7:6 (8:6).

Ekinshi sette esep 1:1 bolǵan mezette qazaqstandyq tennısshi breıkpen alǵa ketti — 2:1. Aqyry matchqa dop bergende, óz múmkindigin jibergen joq — 6:4.

Bir saǵat 32 mınýtqa sozylǵan báseke barysynda Elena 6 eıs jasap, 8 breık-poınttyń ekeýin múlt jibermedi. K.Plıshkova 4 eıs, 1 breıkpen kózge tústi.

Elena Rybakına ekinshi aınalymda álemniń 57-raketkasy, reseılik Anna Blınkovamen sheberlik baıqasady.

Ol reıtıngide ózinen bir saty joǵary turǵan ıspanııalyq Krıstına Býchany joldan taıdyrdy — 6:4, 6:2.

Ótken jyly qazaqstandyq tennısshi fınalǵa deıin jetip, onda Belarýs ókili Arına Sobolenkoǵa ese jibergen edi — 6:4, 3:6, 4:6.

Eske sala keteıik, budan buryn Aýstralııa ashyq chempıonatynda Aleksandr Nedovesovtiń tartysty matchta ese jibergenin jazǵan bolatynbyz.

Sondaı-aq Aleksandr Býblık jarys jolynan shyǵyp qaldy.