Australian Open: Elena Rybakına 16 jastaǵy tennısshini jeńip, ekinshi aınalymǵa shyqty

<p>ASTANA. KAZINFORM &ndash; Qazaqstannyń birinshi, álemniń 7-raketkasy Elena Rybakına Aýstralııa ashyq chempıonatynyń ekinshi aınalymyna shyqty.</p>

Qazaqstandyq tennısshi alǵashqy aınalymda dúnıejúzilik reıtıngide 293-orynda turǵan 16 jastaǵy aýstralııalyq Emerson Djonspen sheberlik baıqasty.

Bul jasóspirimder arasynda ITF reıtıngisinde birinshi orynda turǵan E.Djonstyń «Úlken dýlyǵa» týrnırine alǵash qatysýy edi.

Elenaǵa bastapqy setti aıaqtaýǵa 26 mınýt ýaqyty ketti – 6:1.

Ekinshi sette esep 1:1 bolǵan mezette qarsylasynyń qateligin paıdalanǵan Rybakına breıkke qol jetkizdi. Matchty taǵy bir breıkpen támamdady – 6:1.

Nebári 54 mınýtqa sozylǵan báseke barysynda Rybakına 11 eıspen birge 7 breık-poınttyń beseýin paıdalandy. Djons eıs te, breık te jasaı alǵan joq. 

Elena Rybakına úshinshi aınalymǵa shyǵý úshin álemniń 191-raketkasy, 17 jastaǵy amerıkalyq Iva Iovıchpen talasady. 

Aıtýly dodaǵa E.Djons sekildi arnaıy shaqyrtý alǵan I.Iovıch reıtıngide 99-satydaǵy ıspanııalyq, 33 jastaǵy Nýrııa Parrızas-Dıasty aıqyn basymdylyqpen utty – 6:2, 6:1. 

E.Rybakına 2023 jyly Aýstralııa ashyq chempıonatynda fınalǵa deıin jetse, ótken maýsymda ekinshi aınalymda jeńilip qalǵan edi. 

Eske sala keteıik, budan buryn Aýstralııa ashyq chempıonatynda Aleksandr Býblıktiń jarys jolynan shyǵyp qalǵanyn jazǵan bolatynbyz.