«Aýrýshańdyqty arttyrý úshin balabaqshalarda balalardy ýlap jatyr»: Feık
QR Densaýlyq saqtaý mınıstrligi Sanıtarlyq-epıdemıologııalyq baqylaý komıteti bul habarlamalarǵa qatysty pikirin bildirdi. Málim etilgendeı, balalar kún sýytqandyqtan jıi aýyra bastaǵan.
«Respýblıkada tirkelgen JRVI-men syrqattanýshylyqtyń maýsymdyq deńgeıi baqylaý deńgeıinen aspaıdy. Іndetke qarsy jedel sharalardy qabyldaý maqsatynda QR halqynyń jiti respıratorlyq vırýstyq ınfektsııalarmen jáne tumaýmen jáne tumaý vırýsynyń aınalymymen syrqattanýshylyq jaǵdaıyna kún saıyn monıtorıng júrgiziledi. Tumaý emes respıratorlyq vırýstardyń (paragrıpp, rınovırýs, adenovırýs jáne basqalary) aınalymy jáne A tumaýy vırýsynyń sporadııalyq tirkelýi baıqalady. Aldyńǵy indet maýsymdardaǵydaı, naýqastardyń negizgi úlesi shamamen 70% – 14 jasqa deıingi balalar quraıdy», – dep túsindirdi vedomstvonyń resmı ókili Erjan Baıtanaev.
Ol balalardyń vırýs juqtyrýdan emes, balabaqshalarda bólmelerge ádeıi ýly zattar shashýdyń saldarynan aýyrady degen teorııany joqqa shyǵardy.
«Qazaqstanda dezınfektsııalaý jumystaryn júrgizý úshin, onyń ishinde balabaqshalarda Qazaqstan Respýblıkasy men Eýrazııalyq ekonomıkalyq odaq aýmaǵynda qoldanýǵa ruqsat etilgen jáne Eýrazııalyq ekonomıkalyq odaq elderiniń memlekettik tirkeý týraly kýálikteriniń biryńǵaı tizilimine engizilgen quraldar qoldanylady», – dep habarlady Erjan Baıtanaev.
Keńes etilgendeı, JRVI aldyn alý úshin balalardy adam kóp jınalatyn oryndarǵa aparmaý kerek, turǵyn úıdi jıi jeldetip, bólmede ylǵaldy tazalaý júrgizý, qoldy sabynmen muqııat jáne jıi jýý nemese antıseptıkter paıdalaný qajet.
Demek, mektepke deıingi jastaǵy balalar balabaqshalarda áldebir qaýipti hımıkattar shashýdan aýyrady degen aqparat feık.