«Aýrýhanany jeke menshigine aınaldyrdy»: Aqtóbede bas dárigerdiń ústinen 45 adam shaǵymdandy

AQTÓBE. QazAqparat - Aqtóbe oblysy, Shalqar aýdandyq aýrýhanasy bas dárigeriniń ústinen jumysshylar shaǵymdandy. Barlyǵy 45 adam basshynyń mádenıeti men qyzmetine syn aıtqan, dep habarlaıdy QazAqparat tilshisi.

Aqtóbe oblysy boıynsha ótken jyly 4 aýrýhananyń bas dárigeri qyzmetinen ketti. Kóbi shyǵyn artyp, syn aıtylǵan soń qyzmet oryndaryn bosatty. Máselen, jedel járdem qyzmetiniń bas dárigeri oqýshy óliminen soń aýystyryldy. Al qazirgi kezde Shalqar aýdandyq aýrýhanasynyń bas dárigeri Asqar Esmaǵambetovke qatysty tekserý júrip jatyr.

«Aýrýhanany óziniń jeke menshigine aınaldyrdy, eshqandaı zańǵa qaramaıdy degen aryz tústi. Aqtóbe qalasy men Shalqarda úı salǵan eken. Ári «túnde jumysqa shaqyrady, issaparǵa shyqqanda aqsha aýdarmaıdy, mádenıeti nashar. Osynyń bári shaǵym ishinde jazylǵan. Eshkim kórmedi, eshkim estimeıdi dep oılaýǵa bolmaıdy. Bárin halyq biledi. Kim qandaı kólikpen júretinin, qandaı úıde turatyny belgili. Jel turmasa shóptiń basy qımyldamaıdy» degen sózder bar. Eger basshy aryz jazǵan adamdardy qýdalaıtyn bolsa, bas dárigerdiń ózi jumystan ketedi», - dedi oblys ákimi Berdibek Saparbaev.

Bas dáriger áriptesteriniń aldynda ár adammen kezdesý júrip jatqanyn jetkizdi.

«Qazir osy aryzǵa qol qoıǵan 45 adammen jeke kezdesip, jumys júrip jatyr. Birlesip anyqtaımyz», - dedi ol.

Aldaǵy ýaqytta bul is oblystyq densaýlyq saqtaý basqarmasynyń basshysy Áset Qalıevtiń baqylaýynda bolady.