Aýrýhana tósekteri tez tolyp jatyr: Astana dárigerleri qala turǵyndaryna úndeý jasady

NUR-SULTAN. QazAqparat - Kovıd aýrýhanalarynda ózdiginen demalýǵa áli joq 40 adam ókpeni jasandy jeldetý apparatynda jatyr, dep habarlaıdy QazAqparat ákimdiktiń saıtyna silteme jasap.

Mundaı jaǵdaı elordalyq dárigerlerdi alańdatyp otyr, aq halattylar qala turǵyndaryn saq bolýǵa, karantın men shekteý sharalaryn buzbaýǵa shaqyrady.

Tek vaktsınatsııa ózińizdi jáne jaqyndaryńyzdy qorǵaýǵa, ujymdyq ımmýnıtetti qalyptastyrýǵa múmkindik beredi.

«Tek ótken táýlikte ǵana ınfektsııalyq statsıonarlarǵa 178 adam jatqyzyldy. Tósekter birden tolyp jatyr! Árbir ekinshi naýqasqa ottegi kontsentratory qajet, olar ınvazıvti emes jeldetý astynda jatyr. Al jaǵdaıy tym nasharlar ókpeni jasandy jeldetý apparatyna qosylǵan», — deıdi juqpaly aýrýlar aýrýhanalarynyń medıtsına qyzmetkerleri.

Dárigerler jaǵdaıy aýyr naýqastardyń basym bóligi ekpe almaǵan, onymen qosa sanıtarlyq talaptardy elemeı, saltanatty is-sharalarǵa qatysqan nemese uıymdastyrǵan azamattar ekenin aıtady.

«Bizde bir erli-zaıyptylar boldy. Tekserý júrgizgen kezde olar jaqynda ǵana adam kóp jınalǵan mereıtoıǵa barǵanyn moıyndady. Kózine jas alyp, eshqaıda shyqpaǵanymyz durys bolar edi dep ókinishin bildirdi. Óıtkeni ol kezde kúıeýiniń jaǵdaıy tym nashar edi. Densaýlyqpen oınamaý kerektigin taǵy da eske salǵym keledi. Eger siz sanıtarlyq normalardy saqtamasańyz jáne ekpe almasańyz, onda «maǵan aýrý juqpaıdy» dep erkin júre berýge bolmaıdy», - deıdi kovıdtik aýrýhanalardyń birinde jumys isteıtin juqpaly aýrýlar dárigeri Gúlbaqyt Adıjanova.

2 tamyzdaǵy jaǵdaı boıynsha Nur-Sultan qalasynyń ınfektsııalyq statsıonarlarynda 2903 naýqas jatyr.

Reanımatsııada 260 adam, 40 patsıent ÓJJ apparatyna qosylǵan.

Qazirgi ýaqytta COVID-19-ben kúresý úshin qalada 16 statsıonar jáne 6 myńnan astam medıtsına qyzmetkeri jumyldyrylǵan.