Aýrýdy basatyn «Tramadol» dárisin satyp alatyndarǵa qylmystyq jaýapkershilik engiziledi

ASTANA. QazAqparat – Qazaqstanda zańsyz esirtki jáne psıhotroptyq zattardyń tizimi keńeıedi. Esirtki men prekýrsorlardyń taǵy 27 túri memlekettik baqylaýda bolady. QR Іshki ister mınıstrligi ázirlegen qaýly jobasy Ashyq NQA portalynda jarııalandy, dep habarlaıdy QazAqparat tilshisi.

«ІІM esirtki men prekýrsorlardyń taǵy 27 túrin memlekettik baqylaýǵa engizý jónindegi Úkimet qaýlysy jobasyn ázirledi. Bul tizimde aınalymyn memleket baqylaıtyn 1 myńnan astam zat bar. Qazir oǵan esirtkiniń taǵy 17 jáne prekýrsorlardyń 13 túri, olardy daıyndaý úshin paıdalanylatyn zattar engiziledi», - dedi QR ІІM ókili Shuǵyla Turlybek mınıstrliktiń onlaın brıfınginde.

Atap aıtqanda, «dárihanalyq» nashaqorlyqpen kúresý maqsatynda psıhotroptyq zattar tizimi analgetık «Tramadolmen» tolyǵady.

Ony esirtkige táýeldiler eıforııa áserin alý úshin paıdalanady jáne tutastaı alǵanda esirtkige táýeldilik qalyptasýyna yqpal etedi.

«Qylmystyq jaýapkershilikke tartylatyn «Tramadoldyń» biliktilik mólsheri 0,1 grammǵa deıin – az mólsherde, 10 grammǵa deıin – úlken mólsherde, 10 gramnan bastap – asa úlken mólsherde bolyp jazyldy. Úkimet aktisi qoldanysqa engen soń «Tramadol» tek retsept boıynsha jáne esirtki quraldary men psıhotroptyq zattardyń aınalymyna lıtsenzııasy bar dárihanalyq jáne emdeý-profılaktıkalyq uıymdarda ǵana beriletin bolady. Úkimet qaýlysynyń jobasy «Ashyq normatıvtik quqyqtyq aktiler» portalynda jarııalanǵan», - dep tolyqtyrdy Shuǵyla Turlybek.