Áýlıekól aýdanyndaǵy ormannyń basym bóligi kúlge aınaldy - Qostanaı oblysynyń ákimi

QOSTANAI. QazAqparat – Tilsiz jaý Áýlıekól aýdanyndaǵy orasan zor orman alqabyn kúlge aınaldyryp, 100-den asa úıdi jermen jeksen etti. Alapat órttiń zardabyn joıý boıynsha jumystardyń jaıyn baıandaǵan Qostanaı oblysynyń ákimi Arhımed Muhambetov óziniń resmı Іnstagram paraqshasynda osylaı jazdy, dep habarlaıdy Qazaqparat tilshisi.

«Aıtyp kelmeıtin apat – tilsiz jaý Áýlıekól aýdanyndaǵy orasan zor orman alqabyn kúlge aınaldyryp, 100-den asa úıdi jermen jeksen etti. Saldarynen júzdegen jerlesterimiz baspanasyz qalyp, qurban bolǵan jaǵdaı da tirkeldi.

Alaıda, Prezıdentimiz Qasym-Jomart Kemeluly Toqaev tótenshe jaǵdaıdy alǵashqy kúnnen bastap jeke baqylaýyna aldy. Tipti, óńirge arnaıy jumys saparymen kelip, Úkimetke tıisti tapsyrmalar berdi. Nátıjesinde órt qaýpi tez seıilip, 7 qyrkúıek kúni óńirdegi jaǵdaı tolyq turaqtandy.

Kelesi kezekte – búlingen dúnıeni qalpyna keltirip, turǵyndardy úırenshikti ómirine qaıtarý mindeti turdy. Búginde turǵyn úı qurylysyna 2,3 mlrd teńge qarajat bólindi. Elimizdiń qurylys kompanııalary úılerdiń qurylysyna kirisip ketti.

Memleketpen qatar, otandyq iri kásiporyndar, bankter men qaıyrymdylyq qorlary da ortaq iske at salysyp, óz qarajattaryna birqatar áleýmettik nysandardyń qurylysyn bastady», - dep jazdy óńir ákimi óziniń Іnstagram paraqshasynda.

Aımaq basshysynyń dereginshe, zardap shekkenderge kómek kórsetý úshin arnaıy ashylǵan «Qaıyrymdylyq.KZ» qoryna qazirgi ýaqytta 700 mln teńgeden artyq qarajat túsken. Sonymen qatar, Arhımed Muhambetov qıyn sátte qol ushyn bergen barsha azamattarǵa, órt sóndirýsheler men dárigerlerge jáne eriktilerge alǵysyn aıtty.