Aýqymdy tárbıe jumysy arqyly terrorızmniń aldyn alýǵa bolady – Berdibek Saparbaev
Oblys ákimi Berdibek Saparbaevtyń tóraǵalyǵymen oblystaǵy ekstremızm jáne terrorızmge qarsy kúres máseleleri jóninde májilis ótti. Basqosýda baıandama jasaǵan oblys ákimdigi din ister basqarmasynyń basshysy Jangeldi Omarov «2018-2022 jyldarǵa arnalǵan ekstremızm jáne terrorızmge qarsy is-qımyl» baǵdarlamasynyń maqsatty ındıkatorlary men tarmaqtarynyń oryndalýy týraly habarlady.
Baıandamashy teologtarǵa destrýktıvti aǵymdardyń jetekshileri jáne belsendilerimen kezdesý kóbine qıynǵa soǵatynyn, bul oraıda quqyq qorǵaý organdarynan kómegi keregin jetkizdi.
Oblys ákimi teologtardyń ımamdarmen jáne quqyq qorǵaý organdarymen ózara birlesken is-qımylynyń mańyzyn atap ótti.
«Birlesip jumys isteý kerek. Men óz orynbasaryma birlesken jumystyń qalaı jáne qaı deńgeıde uıymdastyrylǵanyn baqylaýdy tapsyramyn. Bul jerde ımamdardyń jumysyn kúsheıte túsken durys, óıtkeni olardy tyńdap, senetinder kóp», - dep túsindirdi B.Saparbaev.
Aıta ketý kerek, óńirdiń 131 stýdenti elimizdiń joǵary oqý oryndarynda dinı bilim alýda desek, onyń 27-si bıyl bitirmek.
- 115 jambyldyq Qazaqstan musylmandary dinı basqarmasynyń janyndaǵy medrese men kolledjderde bilim alýda. Olardyń 41-i bıyl támamdamaq. Tarazdaǵy Hıbatýlla Tarazı meshitindegi medresede 37 shákirt bilimin shyndaýda. Alty stýdent Mysyrdaǵy Ál-Azhar ýnıversıtetinde oqýda. Onyń ekeýi bıyl bitirip, dinı basqarmada qyzmet ete bastaıdy, - dedi J.Omarov.
Óńir basshysy jıynǵa qatysýshylardy ekstremızm men terrorızmniń aldyn alý jumysyn muqııat uıymdastyrýǵa shaqyrdy.
- Konferentsııalar men semınarlar, olardy ásirese halyqaralyq deńgeıde ótkizý kerek. Der kezinde jáne tıisti deńgeıdegi sharalardy qamtıtyn aýqymdy tárbıe jumystarynyń júzege asyrý arqyly ekstremızm men terrorızm kórinisteriniń aldyn alýǵa bolady. Bul turǵyda buǵan deıin atap ótkenimdeı, barlyq múddeli qurylymdardyń birlesken jumysy óte mańyzdy, - dep túıindedi sózin B.Saparbaev.